नवी दिल्ली : देशभरातील अनेक गर्भवती महिलांनी त्यांच्या प्रसूतीसाठी २२ जानेवारीची तारीख निवडली आहे. या दिवशी अयोध्येतील मंदिरात श्रीरामाच्या मूर्तीची प्राणप्रतिष्ठापना होणार आहे. त्या मुहूर्तावर आपल्या बाळाचा जन्म व्हावा यासाठी महिला सिझेरियन शस्त्रक्रिया करण्यासाठी डॉक्टरांकडे रांगा लावत आहेत.
२२ जानेवारीला प्रसूतीचे नियोजन करणाऱ्या अनेक गर्भवती महिलांच्या नैसर्गिक प्रसुतीची तारीख त्याच्या थोडे दिवस मागे-पुढे आहे. पण या महिलांनी २२ तारखेला सिझेरियन शस्रक्रिया करण्यासाठी डॉक्टरांना विनंती केली आहे. उत्तर प्रदेश, मध्य प्रदेश, गुजरात आदी राज्यांच्या विविध शहरांत डॉक्टरांकडे अशी विनंती करणाऱ्या महिलांची संख्या वाढत आहे. २२ तारखेलाही दुपारी साडेबारा वाजण्याच्या सुमारास शुभमुहूर्त आहे. त्या दरम्यान आपले बाळ जन्माला यावे यासाठी या महिला प्रयत्नशील आहेत. यापूर्वी यातील अनेक महिलांनी २६ जानेवारीला (प्रजासत्ताक दिन) प्रसूतीसाठी प्रयत्न चालवला होता. पण आता अयोध्येतील कार्यक्रमाचा देशभर मोठा गाजावाजा झाल्याने त्यांनी त्याऐवजी २२ जानेवारीला अधिक पसंती दर्शवली आहे.
२२ जानेवारीला दुपारी साडेबारा वाजण्याच्या जवळपासच्या मुहूर्तावर आपले बाळ जन्माला आले तर त्याचे भावी आयुष्य सुखकारक असेल, अशी या जोडप्यांची श्रद्धा आहे. २२ जानेवारीला प्रसूतीचे नियोजन करणाऱ्या अनेक महिलांनी त्यांच्या भावी अपत्याचे नावही ठरवून टाकले आहे. मुलगा जन्माला आला तर त्याचे नाव राम आणि मुलगी जन्माला आली तर तिचे नाव जानकी, असे अनेक जोडप्यांनी ठरवले आहे.
