अभिनेत्री कंगना रणावतने लोकसभा निवडणूक लढवण्याचे संकेत दिले आहेत. २०२४ च्या निवडणुकीत भाजपने उमेदवारी दिल्यास हिमाचल प्रदेशातील मंडी लोकसभा मतदारसंघातून निवडणूक लढवण्यास इच्छुक असल्याचे कंगनाने म्हटले आहे.
एका चॅनेलला कंगनाने मुलाखत दिली. यावेळी तिने पंतप्रधान नरेंद्र मोदी आणि भाजपचं तोंडभरून कौतुक केलं. आपला कोणीच विरोधक नाही हे मोदींना चांगलं माहिती आहे. राहुल गांधींचा सामना हा राहुल गांधींशीच आहे. त्यामुळे मोदींना कणखर विरोधक नाही. अनेक लोक आपल्याला राजकारणात येण्याविषयी विचारत असतात. मलाही निवडणूक लढवायला आवडेल,’’ असंही कंगनाने म्हटले आहे.
बॉलिवूडबद्दल कंगना म्हणाली, ‘‘सध्या बॉलिवूडमध्ये घराणेशाही आहे, मात्र हे फार काळ चालणार नाही. कारण लोक बदलत आहेत. प्रेक्षक जागरूक झाले तर ही घराणेशाही संपुष्टात यायला वेळ लागणार नाही.’’