किंग चार्ल्स-तृतीय अधिकृतपणे ब्रिटनचे नवे राजे बनले आहेत. शनिवारी सेंट जेम्स पॅलेसमध्ये प्रिव्ही कौन्सिलच्या बैठकीत याबाबतची अधिकृत घोषणा करण्यात आली. आता त्यांना ‘किंग चार्ल्स-तृतीय’ म्हणून ओळखण्यात येईल. चार्ल्स यांना ‘ड्यूक ऑफ कॉर्नवाल’ ही उपाधी आपल्या वडिलांकडून वारशात मिळाली आहे. त्यामुळे त्यांची पत्नी कॅमिला यांना यापुढे ‘डचेस ऑफ कॉर्नवाल’ म्हणून ओळखण्यात येईल.
प्रिव्ही कौन्सिलमध्ये वरिष्ठ खासदार, ज्येष्ठ नागरी अधिकारी, कॉमनवेल्थ उच्चायुक्त व लंडनचे लॉर्ड मेयर यांचा समावेश असतो. सामान्यतः या कार्यक्रमात ७०० हून अधिक जण सहभागी होतात; पण यावेळी हा कार्यक्रम अत्यंत शॉर्ट नोटिसीवर आयोजित करण्यात आल्यामुळे त्यात अत्यंत निवडक लोकांचा समावेश होता. यावेळी किंग चार्ल्स म्हणाले, “माझ्यावर सोपवण्यात आलेली जबाबादारी पार पडण्यासाठी मी कटिबद्ध आहे.” या कार्यक्रमात सर्वप्रथम प्रिव्ही कौन्सिलचे लॉर्ड प्रेसिडेंट पेनी मोर्डंट यांनी एलिझाबेथ द्वितीय यांच्या निधनाची घोषणा केली. ही घोषणा उंच आवाजात करण्यात आली. त्यानंतर अनेक प्रार्थना झाल्या. त्यात महाराणीच्या कामगिरीचा लेखाजोखा मांडण्यात आला. तसेच नव्या राजाची ठळक वैशिष्ट्येही सांगण्यात आली.
जाहीरनाम्यावर पंतप्रधान, कँटरबरीचे आर्कबिशप व लॉर्ड चॅन्सलरसह अनेक उच्चपदस्थ अधिकाऱ्यांच्या स्वाक्षऱ्या होत्या. या कार्यक्रमात नव्या राजांनी सत्ता सांभाळल्यानंतर कोणते बदल केले जातील, हेही निश्चित करण्यात आले.
किंग चार्ल्स-तृतीय यांना हाइड पार्क, लंडन टॉवर व नौदलाच्या जहाजांवरून तोफांची सलामी दिली जाईल. त्यानंतर एडिनबर्ग, कार्डिफ व बेलफास्टमध्ये चार्ल्स यांची राजेपदी नियुक्ती कण्यात आल्याची घोषणा वाचली जाईल. शाही परंपरेनुसार सर्वात शेवटी चार्ल्स यांच्या राज्याभिषेकाचा औपचारिक सोहळा होईल. मागील ९०० वर्षांपासून वेस्टमिंस्टर एब्बेमध्ये राज्याभिषेकाचा सोहळा होतो. विल्यम द कॉन्करर यांचा या ठिकाणी पहिला राज्याभिषेक झाला होता.
राजे झाल्यावरही मुकुटासाठी
काही काळ प्रतीक्षा
चार्ल्स यांना कोरोनेशन अर्थात राज्याभिषेकासाठी आणखी काही काळ प्रतीक्षा करावी लागेल. कारण त्याच्या तयारीसाठी मोठा अवधी लागतो. महाराणी एलिझाबेथ द्वितीय यांनाही यासाठी जवळपास १६ महिन्यांची प्रतीक्षा करावी लागली होती. फेब्रुवारी १९५२ मध्ये त्यांच्या वडिलांचे निधन झाले होते. त्यानंतर जून १९५३ मध्ये त्यांचा राज्याभिषेक झाला होता.
