शेवपूर : मध्य प्रदेशातील शेवपूर येथील कुनो राष्ट्रीय उद्यानात नामिबियाहून आणलेल्या 'ज्वाला' नावाच्या मादी चित्त्याने सोमवारी ५ बछड्यांना जन्म दिला आहे. त्यामुळे आता भारतात चित्त्यांची एकूण संख्या वाढून ५३ झाली आहे.
सोमवारी मुख्यमंत्री डॉ. मोहन यादव यांनी सोशल मीडियाच्या माध्यमातून ही माहिती शेअर करत याला 'प्रोजेक्ट चित्ता' आणि वन्यजीव संरक्षणाच्या दिशेने एक ऐतिहासिक यश म्हटले. त्यांनी म्हटले आहे की, कुनोमध्ये आल्यानंतर ज्वालाने येथील वातावरणाशी पूर्णपणे जुळवून घेतले आहे आणि ती उद्यानातील सर्वात यशस्वी मादी चित्त्यांपैकी एक बनली आहे.
कडक पाळत
वन विभागाच्या अधिकाऱ्यांनी सांगितले की, ज्वाला आणि तिचे पाचही नवजात बछडे पूर्णपणे निरोगी आहेत. तज्ज्ञांचे पथक सीसीटीव्ही आणि मैदानी निरीक्षणाद्वारे बछड्यांच्या सुरक्षिततेवर आणि आरोग्यावर लक्ष ठेवून आहे. केंद्रीय वन आणि पर्यावरण मंत्री भूपेंद्र यादव यांनी सोशल मीडिया ‘एक्स’वर लिहिले आहे की, प्रोजेक्ट चित्तासाठी हा अभिमानाचा क्षण आहे. नामिबियातील चित्ता आणि तिसऱ्यांदा आई बनलेल्या ज्वालाने सोमवारी कुनो राष्ट्रीय उद्यानात पाच पिल्लांना जन्म दिला आहे. यासह, भारतात जन्मलेल्या निरोगी पिल्लांची संख्या वाढून ३३ झाली आहे, जो भारतीय भूमीवर चित्त्यांच्या १० व्या यशस्वी पिल्लांच्या समूहाचा (लिटर) महत्त्वाचा टप्पा आहे.
चित्त्यांची संख्या ५३ वर
ही भारताच्या चित्ता संवर्धन प्रवासातील आणखी एक महत्त्वाची उपलब्धी आहे. हे यश त्या पशुवैद्यकीय डॉक्टर्स, फील्ड स्टाफ आणि संबंधित सर्व लोकांच्या समर्पण, कौशल्य आणि अथक परिश्रमाचे परिणाम आहेत, जे या मोहिमेला जमिनीवर यशस्वी करण्यासाठी झटत आहेत. या नवीन बछड्यांच्या आगमनामुळे भारतातील एकूण चित्त्यांची संख्या आता ५३ झाली आहे. वन्यजीव संरक्षणाच्या इतिहासातील हा एक ऐतिहासिक आणि हृदयस्पर्शी क्षण ठरला आहे.
ज्वाला तिसऱ्यांदा आई
ज्वाला (पूर्वी नाव सियाया) त्या आठ चित्त्यांपैकी एक होती, ज्यांना पंतप्रधान नरेंद्र मोदींनी सप्टेंबर २०२२ मध्ये कुनोमध्ये सोडले होते. यापूर्वी तिने मार्च २०२३ मध्ये पहिल्यांदा ४ बछड्यांना जन्म दिला होता, त्यापैकी फक्त एकच जिवंत राहिला. जानेवारी २०२४ मध्ये ३ बछड्यांना जन्म दिल्यानंतर, आता ९ मार्च २०२६ रोजी तिसऱ्यांदा ५ बछड्यांना जन्म दिला आहे.
