कोलकाता : पोलीस कोठडीत मरण पावलेल्या तृणमूल काँग्रेस कार्यकर्त्याच्या कुटुंबीयांची भेट घेण्यासाठी गेलेल्या ममता बॅनर्जी यांना रविवारी संतप्त निदर्शनांना सामोरे जावे लागले. आंदोलकांनी त्यांच्या वाहनाला घेराव घालत ‘चोर’ आणि ‘डकैत राणी’ अशा घोषणा दिल्या. तसेच त्यांच्या वाहनावर चिखल, चपला आणि दगड फेकले.
उत्तर २४ परगणा जिल्ह्यातील हालीशहर येथे गेलेल्या बॅनर्जी यांना पोलिसांच्या सुरक्षा कड्यातून घटनास्थळी जावे लागले. या वेळी रस्त्यावर काही काळ तणावाचे वातावरण निर्माण झाले. सत्ताधारी आणि विरोधी गटांकडून परस्परांवर आरोप करण्यात आले.
या घटनेनंतर पत्रकारांशी बोलताना बॅनर्जी म्हणाल्या, “माझ्या गाडीवर दगड, चपला आणि चिखल फेकण्यात आला. हा केवळ कटाचा भाग आहे. मी येणार असल्याची माहिती पोलिसांना दिली होती. तरीही सुरक्षेची कोणतीही व्यवस्था करण्यात आली नाही.”
ममता बॅनर्जी ज्या कुटुंबीयांची भेट घेण्यासाठी गेल्या होत्या, त्या मृत टीएमसी कार्यकर्त्याचे नाव बिरजू केओट असे आहे. ते कांचरापाडा नगरपालिकेच्या माजी नगरसेविका जेनी शर्मा केओट यांचे पती होते.खंडणीसह काही आरोपांप्रकरणी हालीशहर पोलिसांनी केओट यांना अटक केली होती.
