![नवा महिना, नवे नियम...उद्यापासून FASTag, गॅस सिलिंडरच्या किमतीसह अनेक नियम बदलणार](http://media.assettype.com/freepressjournal-marathi%2F2024-01%2Fb0462be1-cb22-4dd0-bda3-5ec3f2180c95%2Ffasttag.jpg?w=480&auto=format%2Ccompress&fit=max)
नवी दिल्ली : दर महिन्याच्या १ तारखेला नवे नियम लागू होत असतात. त्यात केंद्र सरकारचा अर्थसंकल्प पुढील महिन्यात म्हणजेच १ फेब्रुवारी रोजी सादर होणार आहे. यासोबतच आर्थिक व्यवहारांशी संबंधित अनेक नियमांमध्ये काही बदल होणार आहेत. त्यामध्ये एनपीएस खात्यातून पैसे काढणे, आयएमपीएसचे नवीन नियम, फास्टॅग, गॅस सिलिंडरच्या किमतीसह अनेक नियमांमध्ये बदल होणार आहेत.
सार्वभौम गोल्ड बाँडच्या चौथ्या हप्त्यात गुंतवणुकीची संधी
रिझर्व्ह बँक ऑफ इंडिया २०२३-२४ या आर्थिक वर्षाच्या मालिकेअंतर्गत गोल्ड बाँडचा (SGB) शेवटचा टप्पा फेब्रुवारी महिन्यात जारी करेल. १२ ते १६ फेब्रुवारी दरम्यान त्याची विक्री होईल. त्याची खरेदी किंमत विक्रीच्या दिवशी ठरवली जाईल. गोल्ड बाँडमध्ये ऑफलाईन आणि ऑनलाईन गुंतवणूक करण्याची सुविधा असते. जर एखाद्या व्यक्तीला ऑफलाईन गुंतवणूक करायची असेल तर त्याला नियुक्त बँक शाखांना भेट द्यावी लागेल, फॉर्म भरावा लागेल आणि सर्व औपचारिकता पूर्ण कराव्या लागतील. यापूर्वी आरबीआयने १८ ते २२ डिसेंबर दरम्यान तिसरा हप्ता जारी केला होता.
एनपीएस खात्यातून २५ टक्के रक्कम काढता येणार
पेन्शन नियामक पीएफआरडीएने नॅशनल पेन्शन स्कीम (एनपीएस) मधून पैसे काढण्याच्या नियमांमध्ये बदल जाहीर केले आहेत. नवा नियम १ फेब्रुवारीपासून लागू होणार आहे. त्यानुसार १२ जानेवारी २०२४ रोजी जारी केलेल्या परिपत्रकानुसार, एनपीएस खातेदार मुलांचे शिक्षण, लग्नाचा खर्च, घर खरेदी, वैद्यकीय खर्च इत्यादींसाठी त्यांच्या खात्यात जमा केलेल्या रकमेपैकी केवळ २५ टक्के रक्कम काढू शकतील. याशिवाय तुमचा स्वतःचा व्यवसाय किंवा स्टार्टअप सुरू करण्यासाठी एनपीएस खात्यातून पैसे काढता येतात.हा एनपीएस सदस्यांना पेन्शन खात्यातून २५ टक्क्यांपेक्षा जास्त रक्कम काढता येणार नाही. खातेदार केवळ त्याच्या वैयक्तिक पेन्शन खात्यातून रक्कम काढू शकेल. नियोक्त्याच्या योगदानातून पैसे काढण्याची परवानगी दिली जाणार नाही. यासोबतच खात्यातून जास्तीत जास्त तीन वेळा पैसे काढता येतील. पैसे प्राप्त करण्यासाठी, सदस्यांना त्यांच्या बँक खात्याची त्वरित पडताळणी करावी लागेल.खाते किमान ३ वर्षे जुने असायला हवे.
५ लाखांपर्यंत पाठवण्याची परवानगी
१ फेब्रुवारीपासून कोणत्याही लाभार्थीला न जोडता इमिजिएट पेमेंट सेवेद्वारे (आयएमपीएस) कोणत्याही बँक खात्यात ५ लाख रुपयांपर्यंत पाठवण्याची परवानगी असेल. नॅशनल पेमेंट्स कॉर्पोरेशन ऑफ इंडिया (एनपीसीआय)ने बँक खाते व्यवहार जलद आणि अधिक अचूक करण्यासाठी आयएमपीएस सुव्यवस्थित केले आहे. एनपीसीआयनुसार, फक्त प्राप्तकर्ता किंवा लाभार्थीचा सेलफोन नंबर आणि बँक खाते नाव प्रविष्ट करून पैसे पाठवले जाऊ शकतात.
केवायसीशिवाय फास्टॅग निष्क्रिय
केंद्र सरकारने ३१ जानेवारीपर्यंत खासगी आणि व्यावसायिक वाहनांमध्ये स्थापित केलेल्या सर्व फास्टॅगसाठी केवायसी करण्याचा निर्णय घेतला आहे. याकडे दुर्लक्ष केल्यास वाहनांमध्ये बसवलेला फास्टॅग १ फेब्रुवारीपासून निष्क्रिय (काळ्या यादीत) केला जाईल. अशा परिस्थितीत नियमानुसार वाहनचालकांना टोल प्लाझावर दंड म्हणून दुप्पट टोल टॅक्स रोख स्वरूपात भरावा लागेल. कारण, फास्टॅगशिवाय वाहनांकडून दुप्पट टोल वसूल करण्याचा नियम आहे. भारतीय राष्ट्रीय महामार्ग प्राधिकरण (एनएचएआय)ने एक वाहन, एक फास्टॅग फॉर्म्युला अंतर्गत वाहनांमध्ये स्थापित केलेल्या सर्व फास्टॅगची केवायसी करण्याचा निर्णय घेतला आहे.