नवी दिल्ली : लोकसभा निवडणुकीसाठी इंडिया आघाडीच्या समितीसोबत जागावाटपावरील कोणत्याही बैठकीत आम्ही प्रतिनिधी पाठविणार नसल्याचे तृणमूल काँग्रेसने कळविले आहे. यामुळे पश्चिम बंगालमधील इंडिया आघाडी आणि तृणमूल काँग्रेस यांच्यातील जागावाटपाचा प्रश्नच संपुष्टात आला असल्याचे दिसून आले आहे.
तृणमूल काँग्रेसच्या सूत्रांनी गुरुवारी सांगितले की, आपली भूमिका याआधीच कळवली आहे. काँग्रेसने अशा बैठकीसाठी पक्षाच्या नेत्यांशी संपर्क साधला आणि त्यांना सांगण्यात आले की, ते चर्चेसाठी कोणताही प्रतिनिधी पाठवण्यास उत्सुक नाहीत.
तृणमूल काँग्रेसने काँग्रेसला दोन जागा देऊ केल्या आहेत - ज्या २०१९ च्या लोकसभा निवडणुकीत जिंकल्या होत्या. पश्चिम बंगालमध्ये ४२ लोकसभा मतदारसंघ आहेत. ही ऑफर खूपच कमी आणि स्वीकारणे कठीण असल्याचे काँग्रेसने म्हटले आहे. यात कोणताही बदल केवळ तृणमूल काँग्रेसच्या सर्वेसर्वा व पश्चिम बंगालच्या मुख्यमंत्री ममता बॅनर्जीच करू शकतात, असे तृणमूल काँग्रेसच्या सूत्रांनी सांगितले.
तृणमूल मेघालयातील एका जागेवर आणि आसाममधील किमान दोन जागांवर लढण्याचा विचार करत आहे. तसेच गोव्यातील एका जागेवरून लढण्याची पक्षाची इच्छा होती. तेथे त्यांना २०१२ च्या विधानसभा निवडणुकीत सुमारे पाच टक्के मते मिळाली होती, तरीही ते त्यासाठी दबाव आणणार नाहीत आणि तेथे काँग्रेसला पाठिंबा देणार नाहीत. पश्चिम बंगालच्या संदर्भात, तृणमूलच्या एका वरिष्ठ नेत्याने सांगितले की, तृणमूलची ऑफर मागील विधानसभा आणि लोकसभा निवडणुकीतील काँग्रेसच्या मतांच्या टक्केवारीवर आधारित आहे. पश्चिम बंगालमधील ४२ पैकी किमान ३९ जागांवर काँग्रेसला भूतकाळात पाच टक्क्यांपेक्षा कमी मताधिक्य मिळाले होते. पश्चिम बंगालमध्ये २०२१ च्या विधानसभा निवडणुकीत काँग्रेसला २.९३ टक्के, २०१६ च्या विधानसभा निवडणुकीत १२.२५ टक्के आणि २०१९ च्या लोकसभा निवडणुकीत ५.६७ टक्के मते मिळाली.
तृणमूल काँग्रेसच्या नेत्याने सांगितले की, बंगालमध्ये आपली स्थिती कमकुवत आहे, हे काँग्रेसने मान्य केले पाहिजे. आम्ही पश्चिम बंगालमधील लढाईचे नेतृत्व करण्यास तयार आहोत, आम्ही इंडिया आघाडी आणि भाजपला पराभूत करण्यासाठी वचनबद्ध आहोत. आमची स्थिती डेटासह स्पष्ट केली आहे, त्यामुळे कोणीही दिल्लीत जाऊन दुसरी चर्चा करण्याची गरज नाही.
