नोएडा : नोएडा आंतरराष्ट्रीय विमानतळावरून (एनआयए) १५ जूनपासून व्यावसायिक उड्डाणे सुरू होणार आहेत. उत्तर प्रदेशातील या बहुप्रतीक्षित विमानतळ प्रकल्पाच्या दृष्टीने हा एक महत्त्वाचा टप्पा मानला जात आहे. विमानतळ प्रशासनाने जारी केलेल्या निवेदनानुसार, इंडिगो या विमान कंपनीचे पहिले प्रवासी विमान या विमानतळावरून उड्डाण करेल. त्यानंतर लगेचच आकासा एअर आणि एअर इंडिया एक्स्प्रेस या कंपन्यांच्या सेवाही सुरू होतील.
सध्याच्या पहिल्या टप्प्यात एक धावपट्टी आणि एक प्रवासी टर्मिनल आहे, ज्याची वार्षिक क्षमता १२ दशलक्ष (१.२ कोटी) प्रवाशांची आहे. दीर्घकालीन योजनेनुसार, भविष्यात या विमानतळाची क्षमता दरवर्षी ७० दशलक्ष प्रवाशांपर्यंत नेण्याचे उद्दिष्ट आहे. विमानतळावर लवकरच विमानांचे वेळापत्रक, गंतव्यस्थाने आणि प्रवासी सुविधांची सविस्तर माहिती जाहीर केली जाईल. हे विमानतळ स्विस कार्यक्षमता आणि भारतीय आतिथ्य यांचा उत्कृष्ट मेळ घालणारे जागतिक दर्जाचे विमानतळ म्हणून विकसित करण्यात आले आहे.
राष्ट्रीय राजधानी क्षेत्र आणि पश्चिम उत्तर प्रदेशातील हवाई प्रवासाची वाढती मागणी पूर्ण करण्यासाठी हे विमानतळ तयार करण्यात आले आहे. यामुळे या प्रदेशातील दळणवळण, व्यापार, पर्यटन आणि गुंतवणुकीला मोठी चालना मिळण्याची अपेक्षा आहे. नोएडा आंतरराष्ट्रीय विमानतळाने शाश्वत रचना आणि पर्यावरणास अनुकूल कार्यपद्धतींद्वारे 'नेट-झिरो' (कार्बन तटस्थ) उत्सर्जन साध्य करण्याची आपली कटिबद्धता पुन्हा एकदा अधोरेखित केली आहे.
वैशिष्ट्ये आणि माहिती
पंतप्रधान नरेंद्र मोदी यांच्या हस्ते उद्घाटनानंतर, विमानतळाने ब्युरो ऑफ सिव्हिल एव्हिएशन सिक्युरिटीकडून 'एरोड्रोम सिक्युरिटी प्रोग्राम'ची मंजुरी मिळवली आहे. या मंजुरीमुळे विमानतळाची सुरक्षा चौकट आणि कार्यप्रणाली नियमांच्या अधीन असल्याचे स्पष्ट होते. या विमानतळाचा अधिकृत आयएटीए कोड डीएक्सएन असा आहे.
