छैबासा : झारखंडच्या पश्चिम सिंघभूम जिल्ह्यात माओवाद्यांनी बांदाबेडा गावात शुक्रवारी पोलिसांचा खबऱ्या असल्याच्या संशयावरून एका ३५ वर्षीय इसमाची गोळ्या झाडून हत्या केली.
टोंटो पोलीस ठाण्याच्या हद्दीत शुक्रवारी रात्री उशिरा ही घटना घडली. जितेंद्र लागुरी असे या मृताचे नाव आहे. शुक्रवारी संध्याकाळी घरी परतल्यानंतर नक्षलवाद्यांच्या एका गटाने त्याच्या निवासस्थानी जाऊन त्याची गोळ्या झाडून हत्या केली, असे पोलीस अधीक्षक आशुतोष शेखर यांनी सांगितले. टोंटो आणि गोइलकेरा पोलिस ठाण्याच्या परिसरांसह कोल्हानमध्ये पोलिसांनी सुरू केलेल्या नक्षलवाद्यांविरोधातील कारवाईमुळे नक्षलवादी हताश होऊन अशा कारवाया करीत असल्याचे पोलिसांनी सांगितले.
