चंदिगड : चंदिगड महानगरपालिकेच्या वरिष्ठ उपमहापौर आणि उपमहापौरपदांच्या पुनर्मतदानाच्या काही तासांपूर्वी, आम आदमी पक्षाने (आप) मंगळवारी महानगरपालिकेच्या सहआयुक्तांना महापौर न मिळाल्याने निवडणुकीसाठी पीठासीन अधिकारी उनुपलब्ध असल्याने ही निवडणूक पुढे ढकलण्याची विनंती केली.
आपने सांगितले की, महापौर कुलदीप कुमार ढालोर आपल्या आजारी बहिणीला पाहण्यासाठी लुधियाना येथे आहेत, याशिवाय वरिष्ठ उपमहापौर उमेदवार गुरप्रीत सिंग गाबी शहराबाहेर आहेत आणि पंजाब व हरयाणा उच्च न्यायालयात निवडणुकीशी संबंधित एका प्रकरणाची सुनावणी सुरू आहे.
महापौर कुलदीप कुमार ढालोर यांनी सांगितले होते की, माझी बहीण आजारी आहे आणि मी पदभार स्वीकारू शकलो नाही. त्यामुळे मतदानासाठी महापालिका सभागृहात उपस्थित राहू शकणार नाही. नगरसेवक प्रेम लता यांनी निवडणूक पुढे ढकलण्याचे पत्र सचिव शंभू राठी यांना दिले.
मतदानापूर्वी भाजपचे सर्व नगरसेवक महामंडळ कार्यालयात पोहोचले होते, तर आपचे नगरसेवक आलेच नाहीत. तसेच, नुकतेच भाजपमध्ये प्रवेश केलेले आपचे तीन नगरसेवक आले नाहीत. सोमवारी, महापौरांनी पदभार स्वीकारला नसल्यामुळे आपचा मित्रपक्ष असलेल्या काँग्रेसने निवडणुकीला उशीर करण्यासाठी उच्च न्यायालयात धाव घेतली, तर भाजपने निवडणुकांना उशीर होऊ नये, अशी विनंती केली.
तत्पूर्वी, रिटर्निंग ऑफिसरने घोषित केल्यानुसार भाजप उमेदवाराची निवड बाजूला ठेवून सर्वोच्च न्यायालयाने २० फेब्रुवारी रोजी वादग्रस्त चंदिगड महापौर निवडणुकीच्या खटल्याच्या सुनावणीदरम्यान आप नगरसेवक कुलदीप कुमार यांना महापौर म्हणून घोषित केले होते. महापालिकेच्या ३५ सदस्यांच्या सभागृहात भाजपकडे १४ नगरसेवक असून, खासदार आणि पदसिद्ध सदस्य किरण खेर यांचे आणखी एक मत आहे.
