नवी दिल्ली : नवीन मतदार नोंदणीसाठी वापरल्या जाणाऱ्या ऑनलाइन 'फॉर्म ६' मध्ये बेकायदेशीरपणे बदल करण्यात आल्याचा गंभीर आरोप काँग्रेस नेते राहुल गांधी यांनी गुरुवारी केला आहे. तसेच, टाटा कन्सल्टन्सी सर्व्हिसेसला हा बदल करण्याचे आदेश निवडणूक आयोगातील कोणत्या अधिकाऱ्याने दिले आणि कंपनीच्या कोणत्या अधिकाऱ्याने त्यावर स्वाक्षरी केली, असा थेट सवाल त्यांनी उपस्थित केला आहे.
काँग्रेसचे सरचिटणीस आणि संप्रेषण विभागप्रमुख जयराम रमेश यांनी दावा केला आहे की, फॉर्म ६ मधील हा बदल ‘पंतप्रधान आणि गृहमंत्री' यांच्या जोडीने घडवून आणला आहे. राहुल गांधींनी सोशल मीडिया प्लॅटफॉर्म 'एक्स'वर पोस्ट करत म्हटले आहे की, ऑनलाइन फॉर्म ६ बेकायदेशीरपणे बदलण्यात आला आहे - जसे की खुद्द निवडणूक आयुक्तांनीच नोंदवले आहे. ईसीआयमधील कोणीतरी टाटा कन्सल्टन्सी सर्व्हिसेसला हा बदल करण्याचे आदेश दिले, ‘टीसीएसमधील कोणी यावर स्वाक्षरी केली? आणि हा बदल करण्यासाठी त्यांच्यावर कोणाचा दबाव होता का?
जेन-झी मतदारांना वगळण्यासाठीच बदल...
राहुल गांधींच्या पोस्टला टॅग करत जयराम रमेश म्हणाले, जेन-झी मतदारांना मतदारयादीतून वगळण्यासाठी मुख्य निवडणूक आयुक्तांनी जुलै २०२६ च्या मध्यात घटनेच्या विरोधात जाऊन फॉर्म ६ मध्ये बदल केले. हा सर्व प्रकार स्पष्टपणे पंतप्रधान आणि गृहमंत्र्यांच्या (मोदी-शहा) जोडीने घडवून आणला आहे.
