मुंबई : नववर्षाच्या स्वागताची तयारी करणाऱ्या तमाम कर्जदारांना स्वस्त व्याजदराची भेट रिझर्व्ह बँक गव्हर्नर संजय मल्होत्रा यांनी शुक्रवारी दिली. अर्थव्यवस्थेचा अनपेक्षित विकास आणि कमी होत असलेली महागाई या जोरावर मध्यवर्ती बँकेने रेपो दर पाव टक्क्याने कमी करत तो ५.२५ टक्के केला. फेब्रुवारी २०२५ पासूनची ही चौथी व्याजदर कपात आहे.
देशात स्थिर अर्थव्यवस्थेचे (गोल्डीलॉक्स) चित्र असल्याचे निरीक्षण नोंदवित मल्होत्रा यांनी गेल्या दोन दिवसांपासून सुरू असलेल्या पतधोरण समितीच्या बैठकीनंतर सहा महिन्यांत प्रथमच प्रमुख व्याजदरात कपात करत असल्याचे घोषित केले. डॉलरच्या तुलनेत नव्वदीला पोहोचलेल्या रुपयाला मागे खेचण्यासाठी अर्थव्यवस्थेत अतिरिक्त १ लाख कोटी रुपये उपलब्ध करून देण्याचे वचनही गव्हर्नर मल्होत्रा यांनी दिले.
रिझर्व्ह बँकेच्या पतधोरण समितीची पुढील बैठक ४ ते ६ फेब्रुवारी २०२६ दरम्यान होणार आहे. मध्यवर्ती बँकेने चालू आर्थिक वर्षासाठीची महागाई दर आधीच्या २.६ टक्के अंदाजावरून कमी करत तो २ टक्क्यांपर्यंत खाली आणला आहे, तर विकास दरवाढीचा यापूर्वीचा अंदाज ६.८ टक्क्यांवरून वाढवत ७.३ टक्के केला आहे.
