कोलकाता: पश्चिम बंगालचे मुख्यमंत्री शुभेंदू अधिकारी यांनी रविवारी सरकारी आर. जी. कर मेडिकल कॉलेज आणि हॉस्पिटलमध्ये २०२४ मध्ये झालेल्या आणि देशाला हादरवून सोडणाऱ्या डॉक्टरच्या बलात्कार व हत्या प्रकरणाची नवीन चौकशी जाहीर केली.
अधिकारी यांनी सांगितले की, मृत डॉक्टरच्या आईच्या विनंतीवरून सरकारने हा निर्णय घेतला आहे, ज्या आता भाजपच्या आमदार आहेत.
रत्ना देवनाथ यांनी मला पत्र लिहून नव्याने चौकशी करण्याची विनंती केली होती. मुख्य सचिव आणि तज्ज्ञांच्या टीमसोबत सविस्तर चर्चा केल्यानंतर, मी विशेष आयोग कायदा,१९५२ अंतर्गत ताज्या तपासाची घोषणा करत आहे," असे ते म्हणाले.
पोलीस या प्रकरणाशी संबंधित आपले कर्तव्य बजावण्यात अपयशी ठरले आहेत, असे मुख्यमंत्री म्हणाले. त्यांनी पीडितेच्या अंत्यसंस्कारात झालेल्या कथित त्रुटींची स्वतंत्र चौकशी करण्याचे आदेशही दिले आणि बरकपूरच्या पोलीस आयुक्तांना एफआयआर नोंदवण्याचे निर्देश दिले.
त्यांनी दावा केला की पीडितेचा मृतदेह, जो सुरुवातीला नाटागड कदमताला स्मशानभूमीत अंत्यसंस्कारासाठी रांगेत तिसऱ्या क्रमांकावर होता, तो अचानक पहिल्या क्रमांकावर हलवण्यात आला आणि घाईघाईत अंत्यसंस्कार उरकण्यात आले.
त्यांनी असाही आरोप केला की, अंत्यसंस्काराचे ठरवलेले शुल्क कुटुंबाने भरले नव्हते आणि जवळच्या नातेवाईकाची अनिवार्य स्वाक्षरी देखील घेतली गेली नव्हती. निर्मल घोष, सोमनाथ डे आणि संजीब मुखर्जी यांनी मिळून हे केले," असा आरोप अधिकारी यांनी केला.
मुख्यमंत्र्यांनी सांगितले की, अंत्यसंस्काराशी संबंधित आरोपांचा राज्य पोलीस स्वतंत्रपणे तपास करतील कारण हा विषय सीबीआयच्या सुरू असलेल्या तपासाच्या कक्षेत येत नाही.
