![Sandeshkhali : शहाजहान शेखला अखेर अटक; सहा वर्षांसाठी तृणमूलने केले निलंबित](http://media.assettype.com/freepressjournal-marathi%2F2024-03%2F6b5cbce1-0661-4398-9460-97ff93de63d3%2Fshahjahan_shaikh_arrest.avif?w=480&auto=format%2Ccompress&fit=max)
कोलकाता : संदेशखळी येथील लैंगिक शोषण आणि जमीन बळकावल्याचा आरोप असलेला तृणमूल काँग्रेसचा बडा मानला जाणारा नेता शहाजहान शेख याला गुरुवारी पहाटे अटक करण्यात आल्याची माहिती अतिरिक्त पोलीस महासंचालक (दक्षिण बंगाल) सुप्रतीम सरकार यांनी दिली, तर त्याला पक्षातून सहा वर्षांसाठी निलंबित करण्यात आल्याचे तृणमूल काँग्रेसचे नेते डेरेक ओब्रायन यांनी सांगितले.
संदेशखळीच्या या घटनेनंतर सुमारे ५५ दिवस फरार असलेला शहाजहान शेख याला उत्तर २४ परगणा जिल्ह्यातील सुंदरबनच्या बाहेरील संदेशखळी बेटापासून सुमारे ३० किमी अंतरावर मिनाखान पोलीस ठाण्याच्या क्षेत्रातील बामनपुकुर येथील घरातून अटक करण्यात आली. तेथे तो आपल्या साथीदारांसह लपून बसला असल्याची खबर मिळाल्याचे पोलिसांनी सांगितले. शेखला अटकेनंतर बशीरहाट न्यायालयात नेण्यात आले, तेथे त्याला १० दिवसांची पोलीस कोठडी सुनावण्यात आली.
संदेशखळीच्या घटनेमुळे प्रचंड राजकीय वादळाच्या केंद्रस्थानी असलेला शेख पांढरा कुर्ता-पायजमा परिधान करून सकाळी पावणेअकराच्या सुमारास लॉकअपधून बाहेर आला आणि पोलिसांसह कोर्टरूममध्ये गेला. तेथे वाट पाहणाऱ्या माध्यमांच्या ताफ्याकडेही त्यांनी हाताने खुणा केल्या. अवघे दोन मिनिटे चाललेल्या सुनावणीनंतर तो लॉकअपमध्ये परतला. सीआयडीने तपास हाती घेतल्याने नंतर त्याला कोलकाता येथील राज्य पोलीस मुख्यालयातील भबानी भवन येथे नेण्यात आले. सीबीआय, सक्त अंमलबजावणी संचालनालय (ईडी) किंवा पश्चिम बंगाल पोलीस त्याला अटक करू शकतात. असे सांगून कोलकाता उच्च न्यायालयाने २४ तासांच्या आत शेखला ताब्यात घेतले. राज्यपाल सी. व्ही. आनंदा बोस यांनी सोमवारी रात्री शेखच्या अटकेसाठी राज्य सरकारला ७२ तासांची ‘डेडलाईन’ दिली होती.
शेखबद्दल कोणतीही सहानुभूती नाही -उच्च न्यायालय
तृणमूल काँग्रेसचे नेते शहाजहान शेख यांच्याबद्दल न्यायालयाला ‘कोणतीही सहानुभूती नाही’ असे सांगून कोलकाता उच्च न्यायालयाने गुरुवारी संदेशखळी येथील आदिवासी लोकांवर कथित लैंगिक अत्याचार आणि जमीन बळकावण्याबाबत स्वतःहून प्रस्ताव सादर करताना त्यांच्या वकिलाला ४ मार्च रोजी हजर राहण्यास सांगितले.
शेख यांचे वकील न्यायालयात हजर झाले आणि त्यांनी आपल्या अशिलाबाबत तातडीची बाजू मांडण्याची मागणी केली. मुख्य न्यायमूर्ती टी. एस. शिवग्ननम यांच्या अध्यक्षतेखालील खंडपीठाने संदेशखळी येथील आदिवासी लोकांवर कथित लैंगिक अत्याचार आणि जमीन बळकावण्याबाबत स्वत:हून मोटो प्रस्ताव सादर केला तेव्हा त्यांना सोमवारी न्यायालयात हजर राहण्यास सांगितले.
अटकेविषयी प्रतिक्रिया
बोगद्याच्या शेवटी नेहमीच प्रकाश असतो. मी त्याचे स्वागत करतो. ही शेवटाची सुरुवात आहे. आपल्याला बंगालमधील हिंसाचार संपवायचा आहे. बंगालच्या काही भागांमध्ये गुंडांची सत्ता आहे. हे संपले पाहिजे आणि गुंडांना तुरुंगात टाकले पाहिजे, असे राज्यपाल सी. व्ही. आनंदा बोस यांनी सांगितले. तृणमूल काँग्रेसने म्हटले आहे की, न्यायालयाने डेक साफ केल्यामुळे अटक करणे शक्य आहे, तर भाजपने त्याला ‘स्क्रिप्टेड’ म्हणून संबोधले. कायदेशीर गुंतागुंतीमुळे त्याला सुरुवातीला अटक करता आली नाही. मात्र, त्याच्या अटकेवर कोणतीही स्थगिती नसल्याचे न्यायालयाने स्पष्ट केल्यानंतर, पश्चिम बंगाल पोलिसांनी आपले काम केले. त्याच्या अटकेवरच्या निर्बंधांचा विरोधकांनी गैरफायदा घेतला होता, असे टीएमसीचे प्रवक्ते कुणाल घोष यांनी सांगितले. ते राज्य पोलिसांच्या क्षमतेवर आम्हाला विश्वास असल्याने आम्ही त्याला सात दिवसांत अटक केली जाईल असे सांगितले होते, ते पुढे म्हणाले. राज्य पोलिसांना त्यांच्या आंदोलनामुळे शेखला अटक करण्यास भाग पाडले गेले. टीएमसी आणि राज्य पोलीस गुन्हेगाराला संरक्षण देत होते, असा दावा भाजप प्रदेशाध्यक्षा सुकांता मजुमदार यांनी केला.
पोलिसांची कारवाई व आरोप
पोलिसांनी सांगितले की, रेशन घोटाळ्याप्रकरणी त्याच्या घरावर छापा टाकताना ५ जानेवारी रोजी अंमलबजावणी संचालनालयाच्या (ईडी) अधिकाऱ्यांवर हल्ला केल्याप्रकरणी नझत पोलीस ठाण्यात दाखल केलेल्या दोन गुन्ह्यांमध्ये शेखला अटक करण्यात आली होती. त्याच्यावर विविध भारतीय दंडविधान कलमान्वये आरोप ठेवून अटक केली गेली आहे. यात दंगलीतील दोषी, प्राणघातक शस्त्र घेऊन दंगल करणे, बेकायदेशीर सभा घेणे, हत्येचा प्रयत्न करणे, दरोडा आदी गुन्ह्यांचा समावेश आहे.
एका पोलीस अधिकाऱ्याने सांगितले की, शेखचा शोध मोबाईल फोनच्या टॉवर लोकेशनच्या मदतीने घेण्यात आला. तो वेळोवेळी आपले ठिकाण बदलत होता. त्याच्या मोबाईल फोनशी संलग्न टॉवरच्या लोकेशनच्या मदतीने तो नेमका कुठे आहे, ते लक्षात आले.
पोलिसांनी सांगितले की, बहुतेक तक्रारदारांनी दावा केला आहे की, शेखने लोकांकडून जबरदस्तीने जमीन घेतली आणि परिसरातील महिलांवर अत्याचार केला. ५ जानेवारी रोजी सुमारे १००० लोकांच्या जमावाने ईडी टीमवर हल्ला केल्यापासून तो फरार होता.
पोलिसांचे संरक्षण असल्याचा भाजपचा आरोप
भाजपचे पश्चिम बंगालचे सहप्रभारी अमित मालवीय यांनी आरोप केला आहे की, शेखला राज्य पोलिसांनी ईडी आणि सीबीआयला त्याचा ताबा मिळण्यापासून रोखण्यासाठी अटक केली. पश्चिम बंगाल पोलीस शेख शाजहानला मुख्यमंत्री ममता बॅनर्जींना एस्कॉर्ट करत आहेत. इतके दिवस शेख शाजहान पोलिसांच्या संरक्षणात होता. कोलकाता उच्च न्यायालयाने ईडी आणि सीबीआयला शेखला अटक करण्याची परवानगी देताच, ममता बॅनर्जींच्या पोलिसांनी त्याचा ताबा घेतला.
भ्रष्टाचारी नेत्यांविरोधातील तृणमूलचे धाडस
शहाजहान शेख यांना पक्षातून ६ वर्षांसाठी निलंबित करण्याचा निर्णय आम्ही घेतला आहे. असे सांगत तृणमूल काँग्रेसचे नेते ओब्रायन यांनी पक्षाने यापूर्वीही घेतलेल्या निर्णयांची उदाहरणे देत आजही तेच केल्याचे सांगितले. ज्या नेत्यांवर भ्रष्टाचाराची प्रकरणे आहेत आणि त्यांच्यावर अनेक फौजदारी खटले आहेत, अशा नेत्यांना निलंबित करण्याचे धाडस आम्ही दाखवतो, असेही त्यांनी पत्रकार परिषदेत सांगितले.