कोलकाता : ब्राझीलमधील साखरेचे उत्पादन घटल्याने बाजारातील अडीअडचणी आणखी वाढल्या आहेत. एलपीजी सिलिंडरच्या दरवाढीनंतर आता साखरेच्या भाववाढीमुळे मिठाई उत्पादकांवर मोठा ताण आला असून आगामी काळात मिठाईचे दर वाढण्याची शक्यता आहे.
पश्चिम बंगालचे मंत्री दिलीप घोष यांनी या भाववाढीसाठी इथेनॉल ब्लेंडिंगऐवजी साठेबाजीला जबाबदार धरले आहे. दुसरीकडे, साखर कारखान्यांच्या अधिकाऱ्यांनुसार एप्रिलमध्येच गाळप हंगाम संपला असून आता फक्त शिल्लक साठ्याची विक्री सुरू आहे.
सणासुदीच्या काळात साखरेचे दर अचानक वाढणे ही चिंतेची बाब आहे. १० लाख टन आयात पुरेशी नसून सरकारला आणखी उपाययोजना कराव्या लागतील, असे एका स्थानिक किरकोळ विक्रेत्याने सांगितले.
रेटिंग एजन्सी ‘इक्रा’च्या अहवालानुसार, २०२६ च्या साखर वर्षात एकूण साखर उत्पादन ५.०३ टक्क्यांनी वाढून ३१.१० दशलक्ष टन होण्याचा अंदाज आहे. इथेनॉल निर्मितीसाठी ३.१ दशलक्ष टन साखर वळवल्यानंतर निव्वळ उत्पादन २८ दशलक्ष टन राहील. देशांतर्गत २८.३ दशलक्ष टन वापर आणि ०.७ दशलक्ष टन निर्यात लक्षात घेता, सप्टेंबर २०२६ पर्यंत शिल्लक साठा ४.३ दशलक्ष टन राहील. तसेच एल निनोच्या परिणामांमुळे २०२७ च्या हंगामात साखरेचे उत्पादन आणखी घटण्याची शक्यता वर्तवण्यात आली आहे.
साखर कारखान्यांवर सरकारचे कोणतेही नियंत्रण राहिलेले नाही. घाऊक बाजारातच भाव ₹६५ वर गेले आहेत. त्यामुळे किरकोळ बाजारात दर ₹७० पर्यंत पोहोचतील. इथेनॉल निर्मितीकडे साखर वळवणे हे यामागचे मुख्य कारण आहे, असे - सुशील पोद्दार, अध्यक्ष, कॉन्फेडरेशन ऑफ वेस्ट बंगाल ट्रेड असोसिएशन यांनी म्हटले आहे.
इथेनॉलमुळे साखरेची दरवाढ नाही - सरकार
नवी दिल्ली : इथेनॉल निर्मितीसाठी साखरेचा वापर वळवल्यामुळे साखरेच्या दरात मोठी वाढ होत आहे, हा दावा सरकारने शुक्रवारी फेटाळून लावला. त्याऐवजी कमी देशांतर्गत उत्पादन, सणासुदीच्या काळातील वाढती मागणी आणि साठेबाजीमुळे किमती नियंत्रणात ठेवण्यासाठी साठ्यावर मर्यादा घालणे आणि करमुक्त आयात सुरू करणे यांसारखे निर्णय घ्यावे लागले असल्याचे सरकारने स्पष्ट केले.
