नवी दिल्ली : कोळसा खाण वाटप प्रकरणाशी संबंधित एका गुन्हेगारी प्रकरणात सर्वोच्च न्यायालयाने बुधवारी माजी पंतप्रधान डॉ. मनमोहन सिंग यांच्याविरोधातील खटला औपचारिकपणे बंद केला. या प्रकरणी विशेष न्यायालयाने त्यांच्याविरोधात जारी केलेला समन्सचा (हजेरीचा) आदेशही सर्वोच्च न्यायालयाने रद्दबातल ठरवला.
सरन्यायाधीश सूर्य कांत व अन्य न्यायाधीशांच्या खंडपीठाने केंद्रीय अन्वेषण विभागाचा क्लोजर रिपोर्ट स्वीकारत माजी पंतप्रधानांना या प्रकरणातून क्लीन चिट दिली. विशेष न्यायालयाच्या न्यायाधीशांनी प्रकरण बंद करण्याबाबतचा सीबीआयचा क्लोजर रिपोर्ट फेटाळून लावला होता. असे करण्याचे कोणतेही सबळ कारण नव्हते, असे सर्वोच्च न्यायालयाने स्पष्ट केले.
