धोनीच्या अवमान प्रकरणात अधिकाऱ्याच्या शिक्षेला स्थगिती

नवी दिल्ली : मद्रास उच्च न्यायालयाने निवृत्त आयपीएस अधिकारी जी. संपत कुमार यांना दिलेल्या १५ दिवसांच्या साध्या कारावासाला सर्वोच्च न्यायालयाने सोमवारी अंतरिम स्थगिती दिली. टीम इंडियाचा माजी कर्णधार महेंद्रसिंह धोनी याने कोर्टाचा अवमान केल्याची केस दाखल केली आहे. न्यायाधीश ए. एस. ओक आणि न्यायाधीश उज्वल भुयान यांच्या खंडपीठाने उच्च न्यायालयाच्या आदेशाविरोधात कुमार यांच्या याचिकेवर नोटीस बजावली. या प्रकरणाची पुढील सुनावणी ८ मार्च रोजी ठेवण्यात आली आहे. उच्च न्यायालयाने गेल्या वर्षी १५ डिसेंबर रोजी कुमार यांना गुन्हेगारी अवमान केल्याबद्दल दोषी ठरवले होते आणि त्यांना १५ दिवसांच्या साध्या कारावासाची शिक्षा सुनावली होती. आपल्या अवमान याचिकेत, धोनीने १०० कोटी रुपयांच्या मानहानीच्या दाव्याला उत्तर म्हणून दाखल केलेल्या लेखी निवेदनात न्यायपालिकेविरुद्ध केलेल्या टिप्पणीबद्दल कुमारला शिक्षा देण्याची मागणी केली. इंडियन प्रीमियर लीग (आयपीएल) सट्टेबाजी घोटाळ्यात लोकप्रिय क्रिकेटपटूचे नाव घेतल्याबद्दल धोनीने २०१४ मध्ये माजी पोलिसाविरुद्ध न्यायालयात धाव घेतली होती.