गुलमर्ग : जम्मू-काश्मीरमधील गुलमर्ग येथे गुरुवारी लष्कराच्या वाहनावर दहशतवाद्यांनी हल्ला केला. या हल्ल्यात तीन जवान शहीद झाले असून, दोन मजूर मृत्यू पावले आहेत. तसेच २ जवान जखमी झाले आहेत.
गुलमर्ग येथील बोटापथरी भागातील नागिन येथे ही घटना घडली. लष्कराची गाडी नियंत्रणरेषेकडे निघालेली असताना दहशतवाद्यांनी तिच्यावर अंदाधुंद गोळीबार केला. ही गाडी राष्ट्रीय रायफल्सची होती. या गोळीबारात तीन जवान शहीद, दोन मजुरांचा मृत्यू झाला आहे, तर दोन जवान जखमी झाले. जखमींना रुग्णालयात दाखल करण्यात आले आहे.
या घटनेनंतर सुरक्षा दलांनी या परिसराला वेढा घातला असून दहशतवाद्यांना पकडण्यासाठी शोधमोहीम हाती घेतली आहे.
जम्मू-काश्मीरमध्ये गेल्या चार दिवसांतील हा तिसरा हल्ला आहे. २० ऑक्टोबरला गंदरबल येथे दहशतवाद्यांनी ७ जणांची हत्या केली होती. गेल्या काही दिवसांपासून जम्मू-काश्मीरमध्ये दहशतवादी हल्ले वाढले आहेत. विशेष म्हणजे बिगरकाश्मिरींना वेचून मारले जात आहे.
