नवी दिल्ली : पुण्यातील इसिस मॉड्यूलची संपूर्ण माहिती एनआयएने आपल्या आरोपपत्रात उघड केली आहे. यूएपीए अंतर्गत अटक करण्यात आलेल्या सात दहशतवाद्यांनी भारतात घातपात घडवून आणण्याचा कट रचला होता. या दहशतवादी हल्ल्यासाठी महाराष्ट्र, गोवा, केरळ आणि कर्नाटक या राज्यांची त्यांनी रेकी केल्याचे आरोपपत्रात म्हटले आहे. याशिवाय त्यांच्याकडून बॉम्ब आणि स्फोटके मोठ्या प्रमाणावर तयार केली जात होती. दहशतवादी हल्ले करण्यासाठी त्यांनी जंगलात आणि निर्जन ठिकाणी आपले प्रशिक्षण केंद्र उभारले होते. तिथे ते आयईडी बनवत होते. या दहशतवाद्यांनी बॉम्ब बनवणाऱ्या साहित्याला 'शिरका', 'शरबत' आणि 'रोझ वॉटर' अशी सांकेतिक नावे दिली होती.
एनआयएने आपल्या आरोपपत्रात पुणे इसिस मॉड्यूलचा भंडाफोड केला आहे. नामांकित कंपन्यांकडून लाखोंचे पगार मिळवणाऱ्या या दहशतवाद्यांनी जंगलात प्रशिक्षण केंद्रे उभारली होती. दिवसा कार्यालयात काम करत असताना रात्रीच्या वेळी ते कट अंमलात आणण्याचे काम करत असत. कोणालाही संशय येऊ नये म्हणून हे सर्व करण्यात आले.
एनआयएच्या आरोपपत्रानुसार अटक करण्यात आलेले दहशतवादी उच्चशिक्षित असून त्यांना तंत्रज्ञानाचे चांगले ज्ञान होते. या दहशतवाद्यांनी व्हिडीओग्राफी आणि फोटोग्राफीसाठी ड्रोन खरेदी केले होते. त्याचा स्वतः वापर करून चाचण्याही घेतल्या होत्या. आरोपी झुल्फिकार हा एका बहुराष्ट्रीय आयटी कंपनीत वरिष्ठ प्रकल्प व्यवस्थापक म्हणून काम करत होता. त्याचे वार्षिक पॅकेज ३१ लाख रुपये होते. आरोपी शाहनवाज हा खाण अभियंता असून त्याला स्फोटकांची पूर्ण माहिती होती. अटक आरोपी कादिर पठाण हा ग्राफिक्स डिझायनर म्हणून काम करत होता. या लोकांनी आयईडी आणि स्फोटक बनवण्यासाठी दैनंदिन वस्तूंचा वापर केला आहे, जे पाहून तपास पथकही आश्चर्यचकित झाले आहे.
कट्टरपंथी बनवण्याचे मिशन
एनआयएने आपल्या आरोपपत्रात म्हटले आहे की, अटक करण्यात आलेल्या दहशतवाद्यांनी पुण्यातील जंगलांजवळ त्यांचे प्रशिक्षण तळ उभारले होते. ते शहरातील विविध भागात भाड्याच्या घरात राहत होते आणि लोकांना विशेषतः तरुणांना कट्टरपंथी बनविण्याचे काम करत होते. यातील काही दहशतवाद्यांनी अफगाणिस्तानातही दहशतवादी हल्ले केले होते. या लोकांनी आयईडी बनवण्यासोबतच त्याची चाचणीही केली होती. या दहशतवाद्यांना परदेशातून टेरर फंडिंगही मिळत होते.
