देशाला २०२६ मध्ये मिळणार चारही दिशेला जोडणारे ८ नवे एक्स्प्रेस वे

नवी दिल्ली : भारताच्या आधुनिक पायाभूत सुविधांच्या इतिहासात २०२६ हे वर्ष मैलाचा दगड ठरणार आहे. या वर्षात देशाला ८ नवीन अत्याधुनिक एक्सप्रेस वे मिळणार असून, यामुळे भारतातील रस्ते प्रवास, व्यापार, लॉजिस्टिक्स आणि आर्थिक विकासाला अभूतपूर्व गती मिळणार आहे. उत्तर-दक्षिण आणि पूर्व-पश्चिम दिशांना जोडणाऱ्या या एक्सप्रेस वे नेटवर्कमुळे औद्योगिक केंद्रे, बंदरे, धार्मिक स्थळे आणि पर्यटन हब यांच्यातील अंतर मोठ्या प्रमाणात कमी होणार आहे. तासांचा प्रवास काही मिनिटांत पूर्ण होईल, असा दावा करण्यात येत आहे.

दिल्ली-मुंबई एक्स्प्रेसवे

देशातील सर्वात मोठ्या रस्ते प्रकल्पांपैकी एक असलेला हा एक्स्प्रेस वे सुमारे १,३५५ किमी लांबीचा आहे. दिल्ली, हरयाणा, राजस्थान, मध्य प्रदेश, गुजरात आणि महाराष्ट्रातून जाणारा हा मार्ग ६ ते ८ पदरी असून भविष्यात १२ पदरी विस्ताराची योजना आहे. आतापर्यंत ७७४ किमी मार्ग खुला झाला असून उर्वरित भाग मार्च २०२६ पर्यंत सुरू होण्याची शक्यता आहे.

चेन्नई-बंगळुरू ग्रीनफिल्ड एक्स्प्रेस वे

दक्षिण भारतातील दोन मोठ्या आर्थिक केंद्रांना जोडणारा २५८ किमी लांबीचा हा एक्सप्रेस वे ‘एनएचएआय’कडून भारतमाला प्रकल्पअंतर्गत उभारला जात आहे. जुलै २०२६ मध्ये सर्वसामान्यांसाठी खुला होण्याची शक्यता असून, यामुळे आयटी कॉरिडोर आणि पोर्ट-आधारित लॉजिस्टिक्सला मोठी चालना मिळेल.

रायपूर-विशाखापट्टणम एक्स्प्रेस वे

४६४ किमी लांबीचा, हा ६ पदरी इकॉनॉमिक कॉरिडोर छत्तीसगड, ओदिशा आणि आंध्र प्रदेश या तीन राज्यांना जोडणार आहे. मध्य भारत ते पूर्व किनाऱ्यावरील बंदरांपर्यंत व्यापार जलद होईल. डिसेंबर २०२६ मध्ये हा मार्ग सुरू होण्याची अपेक्षा आहे.

अहमदाबाद-धोलेरा एक्स्प्रेस वे

गुजरातमधील गुंतवणूक हब धोलेरा एसआयआरला अहमदाबादशी जोडणारा १०९ किमी लांबीचा हा प्रकल्प औद्योगिक विकासासाठी महत्त्वाचा मानला जात आहे. २०२६ च्या सुरुवातीलाच हा एक्स्प्रेस वे सुरू होण्याची शक्यता आहे.

दिल्ली-अमृतसर-कटरा एक्स्प्रेस वे

दिल्लीच्या बहादुरगड सीमेजवळून सुरू होणारा हा ६७० किमी लांबीचा एक्सप्रेस वे पंजाबमार्गे जम्मू-कश्मीरमधील कटरा येथे संपेल. यामुळे दिल्ली-अमृतसर प्रवास ८ तासांवरून ४ तासांपर्यंत, तर दिल्ली-कटरा प्रवास १४ तासांवरून सुमारे ६ तासांपर्यंत कमी होईल.

दिल्ली-देहरादून एक्स्प्रेस वे

सुमारे २१० किमी लांबीच्या या कॉरिडोरचा ट्रायल रन १ डिसेंबर २०२५ पासून सुरू झाला आहे. फेब्रुवारी २०२६ मध्ये तो सर्वसामान्यांसाठी खुला होणार असून, दिल्ली-देहरादून प्रवासाचा कालावधी ६ तासांवरून फक्त २.५ तासांपर्यंत कमी होणार आहे.

गंगा एक्स्प्रेस वे

उत्तर प्रदेशातील ५९४ किमी लांबीचा हा ६ पदरी एक्स्प्रेस वे १२ जिल्ह्यांतून जाणार आहे. प्रकल्पाचे सुमारे ९९टक्के काम पूर्ण झाले असून, जानेवारी २०२६ मध्ये उद्घाटन होण्याची शक्यता आहे. यामुळे पश्चिम ते पूर्व यूपी प्रवास जलद होऊन व्यापार आणि पर्यटनाला चालना मिळेल.

अमृतसर-जामनगर एक्स्प्रेस वे

उत्तर-पश्चिम भारतातील महत्त्वाचा १,२५७ किमी लांबीचा इकॉनॉमिक कॉरिडोर बठिंडा, बाडमेर आणि जामनगरसारख्या ऊर्जा व औद्योगिक पट्ट्यांना जोडणार आहे. यामुळे अमृतसर-जामनगर प्रवासाचा वेळ २६ तासांवरून सुमारे १३ तासांपर्यंत कमी होईल. एप्रिल २०२६ पर्यंत हा मार्ग खुला होण्याची शक्यता आहे.