नवी दिल्ली : काळ्या पिवळ्या टॅक्सीला पर्याय म्हणून वातानुकूलित ओला-उबरच्या सेवेला नागरिकांची पसंती मिळाली. आता ओला-उबरच्या अचानक वाढणाऱ्या भाड्यांमुळे नागरिक संतापले आहेत. तुमच्या मोबाइलची बॅटरी किती चार्ज झाली आहे हे पाहून उबर भाड्याची रक्कम आकारत असल्याचा स्वानुभव एका वापरकर्त्याने मांडला आहे.
ओला-उबर या ॲप आधारित टॅक्सी कंपन्यांचे भाडे ठरवण्याची पद्धत नागरिकांना गोंधळात टाकणारी आहे. एकाच ठिकाणी जाणाऱ्या स्थानासाठी ते भिन्न रक्कम आकारत असल्याचे दिसून आले आहे. अँड्रॉइड आणि आयफोन युजरलाही वेगवेगळे दर दाखविले जात असल्याचे काहींनी निदर्शनास आणले होते. आता तर उबर मोबाइलच्या बॅटरीनुसार दर दाखवत असल्याचे एकाने निदर्शनास आणले आहे.
रिषभ सिंग या तरुणाने केवळ आयफोन आणि अँड्रॉइडच नाही तर वेगवेगळ्या मोबाइलवर शिल्लक असलेल्या बॅटरीच्या टक्केवारीवर दर कसे वेगवेगळे दाखविले जातात हे दाखवून दिले. याचा फोटो आणि त्याची निरीक्षणे सोशल मीडियावर व्हायरल होत आहेत.
सिंग यांनी दोन आयफोन आणि अँड्रॉइड फोन वापरले आहेत. यात त्यांनी वेगवेगळे दर दाखविण्यामागचे गणित सांगितले आहे. हे सर्व बॅटरीच्या टक्केवारीवर आधारित आहे.
तसेच कमी बॅटरी लेव्हल असलेल्या मोबाइलवर जास्त भाडे दाखवले जात होते, तर जास्त बॅटरी चार्ज असलेल्या मोबाइलवर कमी भाडे दाखविले जात होते. कमी बॅटरी लेव्हल असलेल्या ग्राहकांना लवकर कुठेतरी पोहोचायचे असते. यामुळे ते मिळेल त्या दराने कॅब बुक करतात. त्यांची गरज ओळखून उबरचा अल्गोरिदम तसे करत असल्याचा दावा सिंग यांनी केला आहे.
अँड्रॉइड आणि आयओएस डिव्हाइसमधील दरात फरक
अँड्रॉइड आणि आयओएस डिव्हाइसमधील दाखवत असलेल्या दरात खूप मोठा फरक होता. समान खाते, ठिकाण आणि वेळ असूनही दर वेगवेगळे दाखविले जात होते. वेगवेगळ्या मोबाइलवर "१३% सूट" किंवा "५०% सूट"सारख्या सवलती दाखवत होते.
