नवी दिल्ली : जागतिक भूराजकीय अस्थिरता आणि विशेषतः पश्चिम आशियातील वाढत्या संकटकाळात, भारताचे परराष्ट्र सचिव विक्रम मिस्त्री रविवारपासून फ्रान्स आणि जर्मनीच्या तीन दिवसांच्या महत्त्वपूर्ण दौऱ्यावर जात आहेत. या दौऱ्यात ऊर्जा, व्यापार आणि संरक्षण यांसारख्या धोरणात्मक क्षेत्रांवर उच्चस्तरीय चर्चा होणार आहे.
दौऱ्याचा तपशील
परराष्ट्र सचिव मिस्त्री पॅरिसमध्ये फ्रान्सच्या परराष्ट्र मंत्रालयाचे सरचिटणीस मार्टिन ब्रियन्स यांच्यासोबत 'भारत-फ्रान्स परराष्ट्र कार्यालय सल्लामसलत' बैठकीचे सह-अध्यक्षपद भूषवतील. त्यानंतर जर्मनीमध्ये ते जर्मनीच्या परराष्ट्र कार्यालयाचे राज्य सचिव गेझा अँड्रियास वॉन गेयर यांच्यासोबत द्विपक्षीय चर्चा करतील.
चर्चेचे विषय
परराष्ट्र मंत्रालयाने दिलेल्या माहितीनुसार, या दौऱ्यात पश्चिम आशियातील (मिडल ईस्ट) संकट आणि त्याचा जागतिक ऊर्जा पुरवठ्यावर होणारा परिणाम यावर दोन्ही देशांच्या नेत्यांशी सविस्तर चर्चा अपेक्षित आहे. संरक्षण सहकार्य, अंतराळ संशोधन, सायबर आणि डिजिटल तंत्रज्ञान, तसेच आर्टिफिशियल इंटेलिजन्स या क्षेत्रांतील भागीदारी वाढवण्यावर भर दिला जाईल. फ्रान्ससोबत नागरी अणुऊर्जेबाबत, तर जर्मनीसोबत 'ग्रीन एनर्जी' आणि शाश्वत विकासाबाबत चर्चा होईल. त्याचबरोबर दोन्ही देशांसोबतचे आर्थिक संबंध अधिक दृढ करणे आणि शिक्षण व लोकांच्या परस्पर संबंधांना चालना देणे हा या दौऱ्याचा मुख्य उद्देश आहे.
हा दौरा भारत-फ्रान्स आणि भारत-जर्मनी यांच्यातील द्विपक्षीय संबंधांचा सर्वसमावेशक आढावा घेण्याची आणि प्राधान्य क्षेत्रांमधील सहकार्य पुढे नेण्याची मोठी संधी आहे, असे परराष्ट्र मंत्रालयाने म्हटले आहे. विक्रम मिस्त्री यांचा हा युरोप दौरा त्यांच्या अमेरिका दौऱ्यानंतर लगेचच होत आहे,
विशेष म्हणजे, या वर्षाच्या सुरुवातीला जानेवारीमध्ये जर्मनीचे चान्सलर फ्रेडरिक मर्झ आणि फेब्रुवारीमध्ये फ्रान्सचे राष्ट्राध्यक्ष इमॅन्युएल मॅक्रॉन यांनी भारताचा दौरा केला होता. त्या पार्श्वभूमीवर परराष्ट्र सचिवांचा हा दौरा धोरणात्मकदृष्ट्या अत्यंत महत्त्वाचा मानला जात आहे.
