नवी दिल्ली : जर्मन ऑटोमोबाईल क्षेत्रातील दिग्गज कंपनी ‘फोक्सवॅगन ग्रुप’ इतिहासातील सर्वात मोठ्या पुनर्रचना प्रक्रियेचा विचार करत आहे. मुख्य कार्यकारी अधिकारी ऑलिव्हर ब्लुम यांच्या नेतृत्वाखालील या योजनेमुळे १ लाख नोकऱ्या कमी होऊ शकतात. याव्यतिरिक्त, जर्मनीतील अनेक कारखाने बंद करणे आणि गुंतवणुकीत कपात करणे असे निर्णयही घेतले जाऊ शकतात.
पुनर्रचनेचा एक भाग म्हणून, फोक्सवॅगन मुख्य ‘पॅसेंजर कार’ ब्रँड आणि ‘पार्ट्स बिझनेस’ वेगळे करून त्यांना स्वतंत्र संस्था बनवण्याची शक्यताही पडताळून पाहत आहे.
जागतिक ऑटोमोबाईल बाजारपेठेतील वाढत्या आव्हानांचा सामना करण्यासाठी आणि कामकाजात सुलभता व कार्यक्षमता आणण्यासाठी हे बदल प्रस्तावित आहेत.
फोक्सवॅगन कंपनीचे सीईओ ऑलिव्हर ब्लुम यांनी वारंवार यावर भर दिला आहे की, फोक्सवॅगनने आता आपल्या मुख्य ऑटोमोटिव्ह व्यवसायावर लक्ष केंद्रित करून नफा वाढवणे गरजेचे आहे.
'मॅनेजर मॅगझिन'च्या अहवालानुसार, या प्रस्तावित बदलांना कंपनीच्या बोर्डाची मंजुरी मिळणे बाकी आहे. या योजनेनुसार, पुढील पाच वर्षांत फोक्सवॅगनच्या नियोजित गुंतवणुकीत १५ टक्क्यांची कपात केली जाईल, ज्यामुळे समूहाचा भांडवली खर्च १३० अब्ज युरोच्या थोडा वर येईल.
कंपनीला सध्या अमेरिकेचे टॅरिफ (आयात शुल्क), चिनी इलेक्ट्रिक वाहन निर्मात्यांकडून मिळणारी तीव्र स्पर्धा आणि इलेक्ट्रिक वाहनांकडे वळताना वाढलेला खर्च अशा अनेक आघाड्यांवर दबावाचा सामना करावा लागत आहे.
