कोलकाता : पश्चिम बंगालमध्ये २०२६ च्या प्रारूप मतदार यादीतून ५८ लाख मतदारांची नावे वगळण्यात आली आहेत. निवडणूक आयोगाने अधिकृत वेबसाइटवर ‘एसआयआर’ची नवी मतदार यादी जाहीर केली. यामध्ये काहींची नावे २०२५ च्या मतदार यादीत होती, पण २०२६ च्या प्रारुप यादीतून ती वगळण्यात आली आहेत. निवडणूक आयोगाने या यादीचे कारणही स्पष्ट केले आहे. याबाबत मिळालेल्या माहितीनुसार, ५८ लाखांहून अधिक असंकलन न करता येणारे एसआयआर गणन फॉर्म आढळले, ज्याच्या आधारे ही नावे मसुदा यादीतून वगळण्यात आली. हे मतदार त्यांच्या नोंदणीकृत पत्त्यांवरून अनुपस्थित आढळले, काहींनी कायमस्वरूपी स्थलांतर केले आहे तर काहींचे निधन झाले असून काही नावे एकापेक्षा जास्त विधानसभा मतदारसंघांमध्ये डुप्लिकेट असल्याचे आढळले, असे आयोगाने म्हटले आहे.
२४ लाखांहून अधिक मतदार मृत
२४ लाखांहून अधिक मतदारांच्या मृत्यूमुळे त्यांची नावे यादीतून वगळण्यात आली आहेत. शिवाय, १२ लाखांहून अधिक मतदार त्यांच्या नोंदणीकृत पत्त्यांवरून गायब असल्याचे आढळले, तर जवळजवळ २० लाख मतदार त्यांच्या पूर्वीच्या मतदारसंघातून कायमचे स्थलांतरित झाले आहेत. शिवाय, १.३८ लाखांहून अधिक मतदारांची नावे एकाहून अधिक मतदारसंघात डुप्लिकेट असल्याचे आढळून आले.
मतदार पडताळणी आणि गणनेदरम्यान आलेल्या इतर गुंतागुंतींमुळे ५७,००० हून अधिक मतदारांची नावेही प्रारुप यादीतून वगळण्यात आली आहेत, असेही निवडणूक आयोगाने स्पष्ट केले.
