नवी दिल्ली : भाजप नेते युमनाम खेमचंद सिंह मणिपूरचे १३ वे मुख्यमंत्री असतील. मंगळवारी भाजप विधिमंडळ पक्षाच्या बैठकीत त्यांची नेतेपदी निवड करण्यात आली असून ते राज्यपालांसमोर सरकार स्थापनेचा दावा सादर करतील.
मणिपूरच्या विधिमंडळ पक्षाचा नेता निवडण्यासाठी नियुक्त केलेले केंद्रीय निरीक्षक तरुण चुग, संबित पात्रा आणि मणिपूरचे माजी मुख्यमंत्री बीरेन सिंह यावेळी उपस्थित होते.
मणिपूरमधून एनडीएचे सुमारे २० आमदार रविवारी रात्री दिल्लीत पोहोचले होते. तर इतर आमदार सोमवारी केंद्रीय नेतृत्वाच्या निर्देशानुसार राजधानीत पोहोचले होते.
९ फेब्रुवारी २०२५ रोजी बीरेन सिंह यांच्या राजीनाम्याच्या ४ दिवसांनंतर १३ फेब्रुवारी २०२५ पासून राष्ट्रपती राजवट लागू करण्यात आली. १२ फेब्रुवारी २०२६ रोजी राष्ट्रपती राजवट संपत आहे. या पार्श्वभूमीवर मणिपूरमध्ये सरकार बनवण्याची प्रक्रिया वेगाने सुरू झाली आहे.
भाजपने मणिपूर विधिमंडळ नेतेपदी यूमनाम खेमचंद सिंह यांची निवड केली, तर कुकी समाजातील महिला नेत्या नेमचा किपगेन यांची उपमुख्यमंत्रीपदी निवड होण्याची दाट शक्यता आहे.
