पनवेल : पनवेलहून मुंबईच्या दिशेने जाणाऱ्या टी परमिट कार चालकाने अचानक ब्रेक दाबल्याने त्याच्या पाठीमागून भरधाव वेगाने येणारी कार व आणखी २ कार एकमेकांवर धडकल्याची घटना सोमवारी सकाळी सायन-पनवेल मार्गावरील कामोठे येथील उड्डाणपुलावर घडली. या अपघातात कुणीही जखमी झाले नसले तरी या चारही कारचे मोठ्या प्रमाणात नुकसान झाले. या अपघातामुळे सायन-पनवेल मार्गावर काही काळ वाहतूककोंडी झाली होती. मात्र, कळंबोली वाहतूक पोलिसांनी अपघातग्रस्त वाहने बाजूला काढून अर्ध्या तासात वाहतूक सुरळीत केली.
या अपघातातील टी परमिट कार सकाळी ११.३० वाजण्याच्या सुमारास मुंबईच्या दिशेने जात होती. ही कार कामोठे उड्डाणपुलावर आली असताना, वॅगनार कार चालकाने अचानक ब्रेक दाबून आपली कार थांबवली. त्यामुळे त्याच्या पाठीमागून भरधाव वेगाने येणारी होंडा सिटी कार त्याच्यावर धडकली. त्यानंतर होंडा सिटी कारवर त्याच्या पाठीमागून येणारी इतर दोन वाहने एकमेकांवर धडकल्या. सुदैवाने या अपघातात कुणीही जखमी झाले नाहीत. मात्र या चारही वाहनांचे मोठ्या प्रमाणात नुकसान झाले. या अपघातामुळे चारही वाहने रस्त्यात अडकून पडल्याने सायन-पनवेल मार्गावर काही काळ वाहनांच्या रांगा लागल्या होत्या.
