नवी मुंबई : बांगलादेशातून १४ वर्षीय मुलीला फूस लावून भारतात पळवून आणून तिच्याकडून वेश्याव्यसाय करून घेणाऱ्या दाम्पत्य व एक दलाल अशा तिघांना अनैतिक मानवी वाहतूक प्रतिबंध कक्षाने तळोजा येथील एका फ्लॅटवर छापा मारून अटक केली आहे. तसेच या त्रिकुटाने वेश्याव्यसायासाठी लावलेल्या अल्पवयीन मुलीची सुटका केली आहे.
तळोजा फेज-१ मधील ऐव्हर शाईन सोसायटीत राहणारे दाम्पत्य १४ ते १५ वयोगटातील मुलीकडून वेश्याव्यवसाय करून घेत असल्याची माहिती अनैतिक मानवी वाहतूक प्रतिबंधक कक्षाला मिळाली होती.
सदर माहितीच्या आधारे मोहिनुर इस्माइल मंडल (३७) व त्याची पत्नी मोहिनी ऊर्फ डॉली मोहिनूर मंडल (२७) दलाल समोन धातुन शेख (२७) तिघेही भाड्याने घेतलेल्या सदर फ्लॅटमध्ये बांगलादेशातून फूस लावून पळवून आणण्यात आलेल्या १४ वर्षे ४ महिन्यांच्या मुलीकडून वेश्याव्यवसाय करून घेताना आढळून आले. त्यानंतर अनैतिक मानवी वाहतूक प्रतिबंधक कक्षाने पीडित मुलीची सुटका केली. तसेच पीडित मुलीला वेश्याव्यवसासाठी लावणाऱ्या तिघांना अटक केली.
