नवी मुंबई : ऐरोली सेक्टर-१४ येथे जेसीबीच्या धडकेत मोटारसायकलवरील दोन तरुणांचा दुर्दैवी मृत्यू झाल्याची घटना शुक्रवारी सकाळी न्यू होरायझन स्कूलसमोर घडली. या घटनेमुळे ऐरोली परिसरात हळहळ व्यक्त केली जात आहे. रबाळे पोलिसांनी या अपघाताला जबाबदार असलेल्या जेसीबी चालकाविरोधात गुन्हा दाखल करून त्याला ताब्यात घेतले आहे.
या अपघातात मृत्यू झालेल्या तरुणांमध्ये दिग्विजय बाबासाहेब दिंडे (१७), रा. ऐरोली सेक्टर-४ आणि हर्षद सावर्डेकर (१८), रा. ऐरोली सेक्टर-८ यांचा समावेश आहे. मिळालेल्या माहितीनुसार, हर्षद आणि दिग्विजय हे दोघेही शुक्रवारी सकाळी सुमारे १० वाजण्याच्या सुमारास ऐरोली सेक्टर-१४ येथून बजाज अवेंजर मोटारसायकलवरून ऐरोली सेक्टर-१० च्या दिशेने जात होते. त्याचवेळी आरोपी चालक हनुमंत मारुती शिंदे (२९) हा त्याच्या ताब्यातील जेसीबी मशीन घेऊन न्यू होरायझन स्कूलसमोरून रस्ता ओलांडत होता.
यावेळी मोटारसायकलला जेसीबीची जोरदार धडक बसली. या धडकेचा वेग इतका भीषण होता की मोटारसायकलवरील दोन्ही तरुण गंभीर जखमी झाले. त्यांना तातडीने उपचारासाठी रुग्णालयात दाखल करण्यात आले; मात्र जखमा गंभीर असल्याने उपचारादरम्यान दोघांचाही मृत्यू झाला
घटनेची माहिती मिळताच रबाळे पोलीस ठाण्याचे वरिष्ठ पोलीस निरीक्षक बाळकृष्ण सावंत आणि पोलीस निरीक्षक शाम बनसोडे यांनी घटनास्थळी भेट दिली.
त्यानंतर रबाळे पोलिसांनी आरोपी जेसीबी चालक हनुमंत शिंदे याला ताब्यात घेतले असून या प्रकरणाचा पुढील तपास सहाय्यक पोलीस निरीक्षक होनमाने करत आहेत.
