नवी मुंबई : एपीएमसी फळ मार्केटमधील किराणा बाजार व दुकाने मंडळाच्या कार्यालयात माथाडी कामगाराच्या रजिस्टर पावतीवर सही करण्यासाठी ५५ हजार रुपयांची लाच मागून तडजोडीनंतर ४३ हजार रुपये स्वीकारताना लाचलुचपत प्रतिबंधक विभागाने दोन जणांना ताब्यात घेतले.
या प्रकरणात लोकसेवक भरत राजाराम कदम, कामिक प्रभारी निरीक्षक आणि खासगी सुरक्षा रक्षक विजय नारायण पवार (३२) यांचा समावेश आहे. तक्रारदाराने माथाडी कामगार म्हणून नियुक्तीसाठी अर्ज केला. त्यानंतर सही करून देण्यासाठी पवार यांनी स्वतःसाठी ५ हजार आणि कदम यांच्यासाठी ५० हजार, अशी एकूण ५५ हजार रुपयांची मागणी केल्याचा आरोप आहे.
एसीबीने याबाबत पडताळणी केल्यानंतर सापळा रचला. कार्यालयातील केबिनमध्ये पंचासमक्ष ४३ हजार रुपये स्वीकारताना दोघांना एसीबी पथकाने ताब्यात घेतले.
