नवी मुंबई : निवडणूक प्रक्रिया पार पाडण्यासाठी मोठ्या संख्येने शासकीय व निमशासकीय कर्मचारी कार्यरत असतात. निवडणूक कर्तव्यावर असताना कर्मचाऱ्यांचा मतदार म्हणून मतदानाचा हक्क डावलला जाऊ नये, यासाठी राज्य निवडणूक आयोगाच्या आदेशानुसार टपाली मतदान (Postal Ballot) सुविधा नवी मुंबई महानगरपालिकेच्या वतीने उपलब्ध करून देण्यात येत आहेत. ही व्यवस्था महापालिका आयुक्त डॉ. कैलास शिंदे यांच्या मार्गदर्शनाखाली राबविण्यात येत आहे.
नवी मुंबई महानगरपालिका क्षेत्रात मतदार म्हणून नोंदणी असलेल्या अधिकारी व कर्मचाऱ्यांनी अंतिम मतदार यादीत आपले नाव व क्रमांक तपासून, आपण ज्या प्रभागाचे मतदार आहोत त्या प्रभागाच्या निवडणूक निर्णय अधिकाऱ्यांकडे दि. ८ जानेवारी २०२६ रोजी प्रपत्र पीबी-१ (PB-1) नमुन्यात अर्ज सादर करून टपाली मतपत्रिकेची मागणी करणे आवश्यक आहे. या अर्जासोबत निवडणूक कर्तव्यावर नियुक्तीचा आदेश जोडणे बंधनकारक आहे.
त्यानंतर निवडणूक निर्णय अधिकाऱ्यांकडून संबंधित कर्मचाऱ्यांना टपाली मतपत्रिका प्रदान करण्यात येईल. अर्जदाराने प्रपत्र पीबी-७ (PB-7) मधील सूचनांचे पालन करून टपाली मतपत्रिकेवर मतदान नोंदवायचे असून, नियमांनुसार बंद लिफाफ्यात ही मतपत्रिका व आवश्यक कागदपत्रे संबंधित निवडणूक निर्णय अधिकारी कार्यालयात परत जमा करणे आवश्यक आहे. या प्रक्रियेत सर्व महानगरपालिकांमध्ये सुसूत्रता व समन्वय राहावा, यासाठी महापालिका आयुक्त डॉ. कैलास शिंदे यांनी सर्व महानगरपालिकांच्या आयुक्तांना पत्राद्वारे सूचना दिल्या असून, नवी मुंबई महापालिका क्षेत्रात मतदार असलेल्या व त्यांच्या महानगरपालिका क्षेत्रात निवडणूक कर्तव्यावर कार्यरत असलेल्या अधिकारी - कर्मचाऱ्यांच्या निदर्शनास ही बाब आणण्याचे आवाहन करण्यात आले आहे. तसेच अशाच प्रकारचे पत्र नवी मुंबई पोलीस आयुक्त यांनाही देण्यात आले आहे.
महानगरपालिका सार्वत्रिक निवडणुकीसाठी रायगड जिल्ह्यातील कर्मचारी, तसेच नवी मुंबईतील सिडको, इतर शासकीय-निमशासकीय कार्यालये व खासगी शाळांमधील कर्मचारी निवडणूक कर्तव्याकरिता नियुक्त करण्यात आले आहेत. नवी मुंबईचे मतदार आहेत, मात्र त्यांची नियुक्ती निवडणूक कर्तव्यावर झाली आहे, अशा कर्मचाऱ्यांना मतदान करता यावे, पालिकेच्या आठही निवडणूक निर्णय अधिकारी कार्यालयात टपाली मतदान सहाय्यता कक्ष स्थापन करण्यात आले आहेत.
स्मिता काळे, नोडल अधिकारी तथा उपायुक्त
हेल्पलाइन क्रमांक
टपाली मतदान प्रक्रियेसाठी मदत व मार्गदर्शन मिळावे, यासाठी दि. ८, ९, १०, ११ व १२ जानेवारी या पाच दिवसांत कार्यालयीन वेळेत, आठही निवडणूक निर्णय अधिकारी कार्यालयांमध्ये स्थापन करण्यात आलेल्या विशेष सहाय्यता कक्षात प्रत्यक्ष उपस्थित राहता येणार आहे. तसेच माहिती व अडचणींसाठी ९८१९४५२४८७ हा हेल्पलाइन क्रमांक कार्यालयीन वेळेत कार्यरत ठेवण्यात आला आहे. याशिवाय nmmcpostalballot@gmail.com हा ई-मेल आयडी संपर्कासाठी उपलब्ध करून देण्यात आला आहे.
पालिकेचे आवाहन
निवडणूक प्रक्रियेत कार्यरत असणाऱ्या अधिकारी व कर्मचाऱ्यांना मतदानाचा हक्क बजावता यावा, यासाठी राज्य निवडणूक आयोगाच्या निर्देशानुसार व नियमानुसार टपाली मतदानाची संपूर्ण व्यवस्था करण्यात आली असून, निवडणूक कर्तव्यावर कार्यरत कर्मचाऱ्यांनी या सुविधेचा लाभ घेऊन लोकशाहीने दिलेला मतदानाचा हक्क बजावावा, असे आवाहन नवी मुंबई महानगरपालिकेच्या वतीने करण्यात आले आहे.
