नवी मुंबई : खारघर येथील गोल्फ कोर्स आणि ड्रायव्हिंग रेंजच्या पाठीमागे असलेल्या डोंगरावर ७०० मीटर आत असलेल्या धबधबाच्या खाली अडकलेल्या ५ व्यक्तींना खारघर अग्निशमन जवानांनी दोरीच्या मदतीने सुखरूप बाहेर काढले. पाचही तरुण सायन कोळीवाडा येथील आहेत.
२ दिवसापासून मुसळधार पाऊस सुरु असल्यामुळे पांडवकडा धबधब्याचा आनंद घेण्यासाठी आले होते. सायन कोळीवाडा येथील आंबेडकर चाळीत राहणारे महेश सुभाष शिरगड (२२), राकेश वेलमुर्गन (१८), प्रतीक जोग (१८), रमेश चिंगमेटे (१९) आणि साहील शेख (२१) हे पाचही तरुण खारघर, सेक्टर-६ मधील डोंगराच्या पायथ्याशी असलेल्या ड्रायव्हिंग रेंजच्या रस्त्याने गोल्फ कोर्सच्या मागील बाजूस असलेल्या धबधब्याचा आनंद घेत होते.
दरम्यान, दुपार नंतर पावसाचा जोर वाढल्याने हे पाचही तरुण धबधब्याखाली अडकल्याची माहिती खारघर अग्निशमन केंद्राला प्राप्त होताच दोरीच्या मदतीने अग्निशमन जवानांनी पाचही तरुणांची सुखरूप सुटका करून त्यांना खारघर पोलिसांच्या ताब्यात दिले.
