मुंबई : महाराष्ट्राच्या अन्न व औषध प्रशासनाकडून (एफडीए) खाद्यपदार्थांच्या सुरक्षेबाबत सुरू असलेल्या तीव्र कारवाईच्या पार्श्वभूमीवर, नेरूळ येथील कांदळवनात सुमारे १०० ब्रँडेड दूध आणि दह्याची पाकिटे बेवारस अवस्थेत फेकून दिलेली आढळली आहेत. एनव्हायर्नमेंट लाईफ फाऊंडेशनच्या स्वयंसेवकांनी स्वच्छता मोहिमेदरम्यान हा प्रकार उघडकीला आणला असून एफडीएच्या कडक कारवाईच्या भीतीपोटी ही उत्पादने फेकल्याची शक्यता व्यक्त केली जात आहे.
महाराष्ट्र अन्न व औषध प्रशासनाचे आयुक्त तुकाराम मुंढे यांच्या नेतृत्वाखाली संपूर्ण राज्यात अन्न सुरक्षा नियमांचे उल्लंघन करणाऱ्यांवर कडक कारवाई मोहीम तीव्र करण्यात आली आहे. अयोग्य किंवा निकृष्ट दर्जाचे खाद्यपदार्थ जप्त करणे आणि त्यांचा नष्ट करण्याची कारवाई विभागाकडून वेगाने सुरू आहे. गेल्या ३२२ आठवड्यांपासून नेरूळमधील कांदळवनांच्या स्वच्छतेचे काम करणाऱ्या या फाऊंडेशनच्या स्वयंसेवकांना ही पाकिटे कांदळवन क्षेत्रात सापडली.
एनव्हायर्नमेंट लाईफ फाऊंडेशनचे संस्थापक धर्मेश बारई म्हणाले, अग्रगण्य ब्रँड्सचे दूध आणि दह्याची पाकिटे खाडीत फेकून दिली जाणे आणि त्यामुळे कांदळवन परिसंस्थेचे नुकसान होत असल्याचे पाहणे अत्यंत क्लेशकारक आहे. आरोग्य कार्यकर्ते चेतन कोठारी म्हणाले की, एफडीए नियमबाह्य अन्नाविरुद्ध कडक कारवाई करत आहे, अशा वेळी पॅकेज्ड खाद्यपदार्थांची अशा प्रकारे विल्हेवाट लावली जाणे चिंताजनक आहे.
...तर नेमके कारण पुढे येईल
ही पाकिटे नेमकी कोणी टाकली? ती कालबाह्य, खराब, भेसळयुक्त होती की इतर कोणत्या कारणास्तव फेकून दिली गेली? याबाबत अद्याप कोणतीही स्पष्ट माहिती मिळालेली नाही. या पाकिटांवरील बॅच तपशील, एक्सपायरी तारीख आणि त्यांच्या स्रोताचा शोध घेतल्यास या प्रकरणामागील सत्य समोर येऊ शकते आणि नियमभंगाची कारवाई स्पष्ट होऊ शकते.
