नमो खारघर मॅरेथॉन २०२४' ला उदंड प्रतिसाद; तब्बल १९ हजार ६०१ स्पर्धक धावले

सामाजिक व शारीरिक हित जोपासले जात उत्कृष्ट व सुयोग्य नियोजन आणि वेगवेगळया सामाजिक संदेशासाठी प्रसिद्ध असलेल्या या स्पर्धेने लोकप्रियतेची शिखरे गाठली.
नमो खारघर मॅरेथॉन २०२४' ला उदंड प्रतिसाद; तब्बल १९  हजार ६०१ स्पर्धक धावले

पनवेल : रामशेठ ठाकूर इंटरनॅशनल स्पोर्टस कॉम्प्लेक्स आणि खारघर रेसिडन्स वेलफेअर असोसिएशन यांच्या संयुक्त विद्यमाने 'एक धाव महिला नेतृत्वाखाली विकासासाठी' हे महिलांप्रती आदरभावना अधोरेखित करणारे घोषवाक्य घेऊन पार पडलेल्या 'नमो खारघर मॅरेथॉन २०२४' स्पर्धेत तब्बल १९ हजार ६०१ स्पर्धकांनी सहभाग घेत यंदाचीही मॅरेथॉन उदंड केली. विशेष म्हणजे आतापर्यतची रेकॉर्डब्रेक करणारी ही मॅरेथॉन ठरली. या स्पर्धेतील पुरुष खुला गटात मृणाल सरोदे तर महिला खुला गटात अर्चना जाधवने प्रथम क्रमांक पटकावित विजेतेपदाचा किताब पटकावला.

सामाजिक व शारीरिक हित जोपासले जात उत्कृष्ट व सुयोग्य नियोजन आणि वेगवेगळया सामाजिक संदेशासाठी प्रसिद्ध असलेल्या या स्पर्धेने लोकप्रियतेची शिखरे गाठली. यंदाचा सहभाग सर्वात जास्त असल्याने आयोजकांकडून या सहभागाबद्दल सर्वांचे आभार मानण्यात आले. यंदाची हि स्पर्धा १४ वी होती. स्पर्धा पुरुष खुला गट १० किलोमीटर अंतर, महिला खुला गट १० किलोमीटर अंतर, १७ वर्षाखालील मुले गट ०५ किमी अंतर, १७ वर्षाखालील मुली गट ०५ किलोमीटर, १४ वर्षाखालील मुले गट ०५ किमी अंतर, १४ वर्षाखालील मुली गट ०५ किमी अंतर, तसेच खारघर दौड गट ०३ किलोमीटर आणि सिनिअर सिटीझन दौड ०२ किलोमीटर, अशा गटात मॅरेथॉन झाली. विजेत्या स्पर्धकांना रक्कम स्वरूपात तसेच मेडल, सर्टिफिकेट आदी बक्षिसे देऊन उपस्थित मान्यवरांच्या हस्ते सन्मानित करण्यात आले.

ही स्पर्धा यशस्वी करण्यासाठी रामशेठ ठाकूर इंटरनॅशनल स्पोर्टस कॉम्प्लेक्सचे सीईओ व मॅरेथॉन प्रमुख परेश ठाकूर यांच्या नेतृत्वाखाली आयोजन, स्वागत, प्रसिध्दी, मार्ग नियोजन, प्रवेशिका देणे व घेणे, पंच व नियमावली, फिडिंग व स्पंजिंग, साहित्य, नियंत्रण, मार्ग आखणी, प्रथमोपचार, स्वयंसेवक, बक्षिस वितरण अशा विविध समित्या कार्यरत होत्या. ज्यातील नामवंत अशा या मॅरेथॉनला उदंड प्रतिसाद लाभत असतो. विशेष म्हणजे लहानग्यांपासून युवा, ज्येष्ठांचा यामध्ये सहभाग होता. त्यामध्ये ९३ वर्षाचे विजय श्रीरंग यांचा सहभाग लक्षवेधी ठरला.

माजी खासदार रामशेठ ठाकूर, आमदार प्रशांत ठाकूर यांच्या मार्गदर्शनाखाली आणि रामशेठ ठाकूर इंटरनॅशनल स्पोर्टस कॉम्प्लेक्सचे सीईओ व मॅरेथॉन प्रमुख परेश ठाकूर यांच्या नेतृत्वाखाली झालेल्या या मॅरेथॉनने आतापर्यंतच्या सहभागाचे रेकॉर्ड यावेळी मोडले. खारघर मधील सेक्टर १९ येथील रामशेठ ठाकूर पब्लिक स्कूल येथून या स्पर्धेला मान्यवरांच्या हस्ते झेंडा दाखवून प्रारंभ झाला. माजी खासदार रामशेठ ठाकूर यांच्या अध्यक्षतेखाली व प्रमुख पाहुणे पनवेल महानगरपालिकेचे आयुक्त गणेश देशमुख यांच्या उपस्थितीत झालेल्या या मॅरेथॉनला स्पर्धेचे मार्गदर्शक आमदार प्रशांत ठाकूर, भाजपचे उत्तर रायगड जिल्हाध्यक्ष अविनाश कोळी, स्पर्धा प्रमुख परेश ठाकूर, रामशेठ ठाकूर इंटरनॅशनल स्पोर्टस कॉम्प्लेक्सचे जनरल सेक्रेटरी वाय. टी. देशमुख, सेलिब्रिटी जया जुगल परमार, भाजपचे पनवेल शहर अध्यक्ष अनिल भगत, यांच्यासह विविध संस्था, संघटनेचे पदाधिकारी, लोकप्रतिनिधी यांची उपस्थिती होती.

देशाचे कार्यकुशल पंतप्रधान नरेंद्र मोदी यांच्या नेतृत्वाखाली भारत देशाने आंतरराष्ट्रीय भरारी घेतली आहे. त्यांच्या दूरदृष्टी निर्णयामुळे आपला देश झपाट्याने प्रगती करत आहे, एवढेच नाही तर जगात आपल्या भारत देशाचे नाव उज्ज्वल करण्याचे काम त्यांनी केले आहे, त्यामुळे आज आपला देश महासत्तेच्या दिशेने वाटचाल करत आहे. सर्वसामान्य माणसाला काय हवे आहे याची जाणीव त्यांना आहे, म्हणूनच त्यांचे लोकपोयोगी निर्णय देशाच्या उत्कर्षांसाठी हिताचे ठरले आहेत. देशाचा झालेल्या विकासाबद्दल आदरभावना व्यक्त करण्यासाठी संपूर्ण महाराष्ट्रात 'नमो चषक' स्पर्धा होत आहे. त्याचाच एक भाग म्हणून पनवेल विधानसभा क्षेत्रात विविध कला व क्रीडा स्पर्धा आयोजित केल्या आहेत. त्या अंतर्गत झालेल्या या 'नमो खारघर मॅरेथॉन' ला स्पर्धक आणि क्रीडा रसिकांनी दिलेल्या उत्स्फूर्त प्रतिसादाबद्दल तसेच ही मॅरेथॉन यशस्वी करण्यासाठी मेहनत घेणाऱ्या सर्वांचे मी आभार मानतो. - आ. प्रशांत ठाकूर

मॅरेथॉन स्पर्धेचे नियोजन अत्यंत काळजीपूर्वक करावे लागते. आयोजनात कसूर राहू नये, यासाठी वेळोवेळी नियोजन करून त्या अनुषंगाने आढावा घ्यावा लागतो. २००६ साली सुरू झालेली ही स्पर्धा आहे त्यामुळे नियोजनबद्ध आखणीचा सराव झाला आहे, त्यातच दरवर्षी या मॅरेथॉनला वाढता प्रतिसाद मिळत आहे आणि यंदाही तशी नोंद झाली आहे. त्यामुळे आम्हाला आयोजनात स्फूर्ती लाभत असते.

- परेश ठाकूर, चेअरमन, रामशेठ ठाकूर इंटरनॅशनल स्पोर्टस

Related Stories

No stories found.
logo
marathi.freepressjournal.in