मुंबई : महाराष्ट्र ऑलिम्पिक संघटनेच्या निवडणुकीत उपमुख्यमंत्री अजित पवार यांच्या ऑलिम्पिक पॅनेलचे पारडे जड असल्याचे स्पष्ट झाले आहे. येत्या रविवारी होणाऱ्या निवडणुकीत अजित पवार गटाचे २१ उमेदवार निवडणूक रिंगणात असून त्यांपैकी ३ उमेदवार बिनविरोध निवडून आले आहेत.
मुंबईत २ नोव्हंबर रोजी होणाऱ्या महाराष्ट्र ऑलिम्पिक संघटनेच्या पंचवार्षिक निवडणुकीसाठी ऑलिम्पिक पॅनलची घोषणा अर्जुनपदक विजेते अशोक पंडित आणि ध्यानचंद पदक विजेते प्रदीप गंधे यांनी केली आहे. ३० मतदार संघटनांपैकी २२ पेक्षा अधिक संघटनांनी अजित पवार यांना आपला पाठिंबा जाहीर केला आहे.
बहुमत असल्याने उपमुख्यमंत्री अजित पवार यांच्या गटाचा विजय पक्का आहे. यापूर्वीच उपाध्यक्ष पदासाठी आदिल सुमारीवाला, प्रदीप गंधे व प्रशांत देशपांडे यांची बिनविरोध निवड झाली आहे. विजयी उमेदवार आंतरराष्ट्रीय बॅडमिंटनपटू प्रदिप गंधे म्हणाले की, “गेल्या पाच वर्षांत महाराष्ट्राने राष्ट्रीय क्रीडा स्पर्धेत देशात अव्वल स्थान पटकावले आहे. याचे श्रेय क्रीडा क्षेत्राला सर्वतोपरी मदत करणारे मुख्यमंत्री देवेंद्र फडवणीस, उपमुख्यमंत्री एकनाथ शिंदे, क्रीडामंत्री, क्रीडा प्रशासन यांना देखील आहे.”
पाच वर्षांमध्ये महाराष्ट्र ऑलिम्पिक संघटनेने राज्यातील सर्व क्रीडा संघटनांना सोबत घेऊन काम केले आहे. राज्यातील खेळाडूंनी प्रचंड मेहनत घेऊन मागील तीन वर्षांमध्ये तीनही राष्ट्रीय स्पर्धांमध्ये देशात प्रथम क्रमांक मिळवलेला आहे. हे यश राज्यातील सर्व क्रीडा संघटना आणि खेळाडूंच्या प्रयत्नांचेच आहे. अजित पवार यांच्या नेतृत्वामुळे एमओएच्या संकल्पनेतून राज्यात महाराष्ट्र ऑलिम्पिक भवनासह देशातील पहिले क्रीडा संग्रहालय साकार होत आहे.
अजित पवार यांच्या पॅनेलचे उमेदवार
अध्यक्ष - अजित पवार, वरिष्ठ उपाध्यक्ष - अशोक पंडित, उपाध्यक्ष - आदिल सुमारीवाला (बिनविरोध निवड), उपाध्यक्ष - प्रदीप गंधे (बिनविरोध निवड), उपाध्यक्ष - प्रशांत देशपांडे (बिनविरोध निवड), उपाध्यक्ष - दयानंद कुमार (बिनशर्त पाठिंबा), सचिव - नामदेव शिरगांवकर, सहसचिव - निलेश जगताप, उदय डोंगरे, मनोज भोरे, चंद्रजीत जाधव, खजिनदार - स्मिता शिरोळे, कार्यकारिणी सदस्य - संदीप चौधरी, संदीप ओंबासे, राजेंद्र निम्बाते, गिरीश फडणीस, रणधीर सिंग, किरण चौगुले, समीर मुणगेकर, संजय वळवी, सोपान कटके आदी.
