मेलबर्न : इंग्लंडचा वेगवान गोलंदाज जोफ्रा आर्चरला पुन्हा एकदा दुखापतीने सतावले आहे. डाव्या बाजूचे स्नायू ताणले गेल्यामुळे आर्चर ऑस्ट्रेलियाविरुद्धच्या उर्वरित दोन्ही कसोटी सामन्यांना मुकणार आहे. तसेच तिसऱ्या क्रमांकावर सातत्याने अपयशी ठरलेल्या ओली पोपच्या जागी डावखुरा फलंदाज जेकब बेथलला संधी देण्यात आली आहे.
२६ डिसेंबरपासून मेलबर्न येथे इंग्लंड-ऑस्ट्रेलिया यांच्यातील चौथी बॉक्सिंग डे कसोटी सुरू होईल. उभय संघांतील या पाच लढतींच्या मालिकेत ऑस्ट्रेलियाने ३-० अशी विजयी आघाडी घेतली आहे. ऑस्ट्रेलियाने अवघ्या ११ दिवसांतच ही मालिका जिंकली आहे. त्यांनी पहिली कसोटी दोन दिवसांत, दुसरी कसोटी चार दिवसांत, तर तिसरी कसोटी पाच दिवसांत जिंकली. त्यामुळे इंग्लंडच्या खेळाडूंवर टीकेचा भडिमार होत आहे.
१८८२-८३ पासून ऑस्ट्रेलिया-इंग्लंड यांच्यात खेळवण्यात येणाऱ्या कसोटी मालिकेस ॲशेस असे संबोधले जाते. २०२३मध्ये इंग्लंड येथे अखेरची ॲशेस मालिका झाली होती. त्यामध्ये दोन्ही संघांना २-२ अशा बरोबरीवर समाधान मानावे लागले. यावेळी मात्र कांगारूंनी मालिकेवर वर्चस्व मिळवले आहे. दरम्यान, पॅट कमिन्स मालिकेबाहेर गेल्याने स्टीव्ह स्मिथ ऑस्ट्रेलियाचे नेतृत्व करणार आहे.
