निशिन : आशियाई क्रीडा स्पर्धेत भारतीय बॉक्सर्सची दमदार घोडदौड सुरूच असून अनुभवी लव्हलिना बोरगोहेन, प्रिया घांघस आणि कपिल पोखरिया यांनी आपापल्या वजनी गटात उपांत्य फेरीत धडक मारली आहे. या विजयांसोबतच या तिन्ही बॉक्सर्सनी भारतासाठी पदक निश्चित केले आहे.
महिलांच्या ७५ किलो वजनी गटात टोकियो ऑलिम्पिक कांस्यपदक विजेत्या लव्हलिना बोरगोहेनने दक्षिण कोरियाच्या सेआँग सुयॉनचा ५-० असा एकतर्फी पराभव केला. लव्हलिनाने सुरुवातीपासूनच आक्रमक पवित्र घेत आपल्या उत्कृष्ट जॅब आणि क्रॉस पंचच्या जोरावर सामन्यावर पकड मिळवली. नागोया येथे खेळवल्या जात असलेल्या या स्पर्धेत उपांत्य फेरीत तिची गाठ कझाकस्तानच्या ७० किलो गटातील जागतिक विजेत्या नतालिया बोगदानोव्हाशी पडेल.
महिलांच्या ६० किलो वजनी गटाच्या उपांत्यपूर्व फेरीत राष्ट्रकुल क्रीडा स्पर्धा विजेत्या प्रियाने मिजगोना समदोव्हाविरुद्ध पिछाडीवरून पुनरागमन करत एकमताने विजय मिळवला. पहिल्या फेरीत प्रतिस्पर्धी खेळाडूने ३-२ अशी आघाडी घेतली होती, मात्र नंतरच्या दोन फेऱ्यांमध्ये प्रियाने पलटवार केला.
