![ऑस्ट्रेलिया-विंडीज कसोटी मालिका : ऑस्ट्रेलियाचे विंडीजवर तीन दिवसांतच वर्चस्व](http://media.assettype.com/freepressjournal-marathi%2F2024-01%2F5b458820-10cb-411c-aa78-5c3a49aeca05%2Fgdf.png?w=480&auto=format%2Ccompress&fit=max)
ॲडलेड : जोश हेझलवूडने (३५ धावांत ५ बळी) दुसऱ्या डावातही प्रभावी गोलंदाजी करताना वेस्ट इंडिजचा डाव १२० धावांतच गुंडाळला. त्यानंतर माफक २६ धावांचे लक्ष्य ऑस्ट्रेलियाने एकही फलंदाज न गमावता गाठून विंडीजवर पहिल्या कसोटीत तिसऱ्या दिवशीच १० गडी राखून दणदणीत विजय नोंदवला. या विजयासह कांगारूंनी दोन सामन्यांच्या मालिकेत १-० अशी आघाडी घेतली असून उभय संघांतील दुसरी कसोटी २५ जानेवारीपासून ब्रिस्बेन येथे खेळवण्यात येईल.
ॲडलेड येथे झालेल्या या कसोटीत गुरुवारच्या ६ बाद ७३ धावांवरून पुढे खेळताना हेझलवूडसमोर विंडीजचा फार काळ निभाव लागू शकला नाही. त्यामुळे ३५.२ षटकांत त्यांचा संघ १२० धावांत गारद झाला. हेझलवूडने कारकीर्दीतील सर्वोत्तम कामगिरीची नोंद करताना सामन्यात एकूण ९ बळी पटकावले. मिचेल स्टार्क व नॅथन लायन यांनी दुसऱ्या डावात प्रत्येकी दोन बळी मिळवले.
त्यानंतर स्टीव्ह स्मिथ (नाबाद ११) व मार्नस लबूशेन (नाबाद १) यांनी ऑस्ट्रेलियाच्या विजयावर शिक्कामोर्तब केले. उस्मान ख्वाजा चेंडू लागल्याने जायबंदी होऊन तो ९ धावांवर माघारी परतला. विंडीजकडून या लढतीत पदार्पणवीर शमार जोसेफने चांगली कामगिरी करताना पहिल्या डावात ५ बळी मिळवले. दरम्यान, ऑस्ट्रेलियाकडून ११९ धावांची खेळी साकारणारा ट्रॅव्हिस हेड सामनावीर पुरस्काराचा मानकरी ठरला.
हेझलवूडने कसोटी कारकीर्दीत ११व्या डावात पाच बळी मिळवले. ६७ कसोटींमध्ये त्याच्या नावावर २५८ बळी जमा आहेत.