मेलबर्न : भारताचा दिग्गज टेनिसपटू रोहन बोपण्णा आणि त्याचा चीनी जोडीदार झँग शुई यांनी ऑस्ट्रेलियन ओपनच्या मिश्र दुहेरीच्या उपांत्यपूर्व फेरीत प्रवेश केला. रविवारी होणाऱ्या दुसऱ्या फेरीच्या सामन्यात या जोडीला वॉकओव्हर मिळाला.
बोपण्णा-शुई जोडीचा सामना युनायटेड स्टेट्सचा टेलर टाऊनसेंड आणि मोनॅकोच्या ह्युगो न्यास यांच्याशी होणार होता. मात्र या सामन्यात वॉकओव्हर मिळाल्याने भारत-चीन जोडीने उपांत्यपूर्व फेरीत प्रवेश केला.
टिमिया बाबोस- मारसिलो ॲरेवालो आणि ऑस्ट्रेलियन जोडी ऑलिव्हीया गडेकी-जॉन पिर्स यांच्यात सामना होणार आहे. त्यांच्यातील विजेत्या जोडीशी बोपण्णा आणि शुई यांचा पुढचा सामना होणार आहे.
बोपण्णा-शुईने स्पर्धेची सुरुवात दणक्यात केली. स्पर्धेच्या पहिल्याच सामन्यात फ्रान्स-क्रोएशियाच्या जोडीला ६-४, ६-४ असे पराभूत करत त्यांनी आगेकूच केली.
