डार्विन : हसन मेहमूदसह (५५ धावांत ६ बळी) बांगलादेशच्या वेगवान गोलंदाजांनी केलेल्या भेदक माऱ्यापुढे कांगारूंची फलंदाजी ढेपाळली. त्यामुळे बांगलादेशने पहिल्या कसोटीत ऑस्ट्रेलियाचा पहिला डाव ५३ षटकांत १९८ धावांत गुंडाळला.
त्यानंतर बांगलादेशच्या फलंदाजांनी पहिल्या दिवसाचा खेळ संपला तेव्हा १ बाद ९६ धावांपर्यंत मजल मारली असून ते फक्त १०२ धावांनी पिछाडीवर आहेत. तांझिद हसन ३२, तर मोमिनूल हक ३५ धावांवर नाबाद आहे. शदमन इस्लाम २० धावांवर माघारी परतला. मात्र पहिला दिवस गाजवला तो कारकीर्दीतील सर्वोत्तम कामगिरी करणारा २६ वर्षीय वेगवान गोलंदाज हसन यानेच.
नाणेफेक जिंकून प्रथम फलंदाजी करणाऱ्या ऑस्ट्रेलियाने ४५ धावांची बिनबाद सुरुवात केली होती. मात्र हसनने आपल्या सलग दोन षटकांत जॅक वेदराल्ड (२३) आणि ट्रेव्हिड हेड (२२) या दोन्ही सलामीविरांना बाद करून ऑस्ट्रेलियाला धक्के दिले.
त्यानंतर तस्कीन अहमद (२-५५) आणि इबादत हुसेन (२-३९) यांनी हसनला सुरेख साथ देत ऑस्ट्रेलियाच्या फलंदाजीला खिंडार पाडले. ऑस्ट्रेलियाकडून केवळ स्टीव्ह स्मिथ लढाऊ खेळ करत ७१ धावांची खेळी केली.
