टोरंटो : भारताचा युवा ग्रँडमास्टर डी. गुकेशने कँडिडेट्स बुद्धिबळ स्पर्धेतील आपले अपराजित्व कायम राखताना चौथ्या फेरीच्या लढतीत अमेरिकेच्या अग्रमानांकित फॅबियानो कारुआनाला बरोबरीत रोखले. नाशिककर विदित गुजराथीला मात्र सलग दुसऱ्या पराभवाला सामोरे जावे लागले, आर. प्रज्ञानंदने नाकामुराविरुद्ध बरोबरी पत्करली.
खुल्या विभागातील चौथ्या फेरीत, विदितला गेल्या दोन जागतिक अजिंक्यपद लढतींतील उपविजेत्या इयान नेपोम्नियाशीकडून पराभव पत्करावा लागला. विदितने स्पर्धेची सकारात्मक सुरुवात केली होती. पहिल्या फेरीत गुकेशला बरोबरीत रोखल्यानंतर दुसऱ्या फेरीत विदितने जेतेपदासाठी प्रबळ दावेदार मानल्या जाणाऱ्या अमेरिकेच्या हिकारू नाकामुराला पराभवाचा धक्का दिला होता. मात्र, त्यानंतर त्याला कामगिरीत सातत्य राखता आलेले नाही. पुढील दोन फेऱ्यांमध्ये त्याला आर. प्रज्ञानंद आणि नेपोम्नियाशी यांच्याकडून हार पत्करावी लागली आहे.
गुकेशने मात्र आपली चांगली कामगिरी सुरू ठेवताना चारपैकी तिसऱ्या सामन्यात बरोबरीची नोंद केली. तसेच त्याने दुसऱ्या फेरीत प्रज्ञानंदवर विजयही मिळवला होता. कारुआनाविरुद्ध काळ्या मोहऱ्यांनिशी गुकेशने उल्लेखनीय खेळ केला. कारुआनाने इटालियन पद्धतीने सुरुवात केली आणि सामन्याच्या मध्यात गुकेशवर दडपण आणले. मात्र, गुकेशने संयम बाळगला. त्याने आपल्या एका प्याद्याचे बलिदान दिले आणि यानंतर त्याला कारुआनाची काही प्यादी टिपता आली. अखेरीस दोन्ही वजीर आणि काही प्यादी पटावर शिल्लक असल्याने कारुआनाला विजयाची संधी होती. परंतु, गुकेशने भक्कम बचाव केला. त्यामुळे ७२ चालींअंती कारुआनाने बरोबरी मान्य केली.
या निकालांनंतर खुल्या विभागात नेपोम्नियाशी तीन गुणांसह अग्रस्थानी पोहोचला आहे. गुकेश आणि कारुआना प्रत्येकी २.५ गुणांसह संयुक्तरीत्या दुसऱ्या स्थानावर आहेत. प्रज्ञानंद दोन गुणांसह चौथ्या स्थानी आहे. त्याखालोखाल असणाऱ्या विदित, अबासोव, फिरुझा आणि नाकामुरा यांचे प्रत्येकी १.५ गुण आहेत.
महिलांमध्ये हम्पीचा दारुण पराभव
महिला विभागात भारताची ग्रँडमास्टर कोनेरू हम्पीला यंदाच्या स्पर्धेतील सर्वात युवा बुद्धिबळपटू नुरग्युल सलिमोवाकडून पराभव पत्करावा लागला. त्यामुळे हम्पीची पहिल्या विजयाची प्रतीक्षा कायम राहिली. हम्पीला पहिल्या तीन फेऱ्यांमध्ये बरोबरीवर समाधान मानावे लागले होते. काळ्या मोहऱ्यांनिशी खेळणाऱ्या हम्पीला सलिमोवाच्या कॅटलान पद्धतीचा सुरुवातीला सामना करावा लागला. अखेर हम्पीने ६२व्या चालीनंतर हार मान्य केली.
