रत्नागिरीच्या विवेक हॉटेलमध्ये संपन्न झालेल्या रत्नागिरी कॅरम लीगच्या पाचव्या पर्वात कॅरम लव्हर्स संघाने जेतेपद मिळवले. भारतीय आयुर्विमा महामंडळ, इंफिगो, ओएनजीसी व क्रिस्टल पुरस्कृत या स्पर्धेतील अंतिम सामन्यात कॅरम लव्हर्सने सत्यशोधक स्ट्रायकर्स संघावर २-१ अशी मात केली.
अंतिम फेरीतील पहिल्या लढतीत कॅरम लव्हर्सच्या मोहम्मद अरिफने अहमद अलीवर २०-२२, २५-१, २५-६ अशी पिछाडीवरून सरशी साधली. दुसऱ्या सामन्यात के. श्रीनिवासनने योगेश परदेशीवर २५-८, २५-४ असे सरळ दोन सेटमध्ये वर्चस्व गाजवून संघाला २-० अशी विजयी आघाडी मिळवून दिली. दुहेरीच्या लढतीत सत्यशोधक संघाच्या मोहम्मद घुफ्रान व एल. सूर्यप्रकाश जोडीने अभिषेक चव्हाण व राहुल सोळंकी यांच्यावर ४-२५, २४-१९, २५-२० असा विजय मिळवूनही त्यांना पहिल्या दोन लढती गमावल्यामुळे उपविजेतेपदावर समाधान मानावे लागले.
विजेत्या संघाला १ लाख ७५ हजार, तर उपविजेत्या संघाला १ लाख ५० हजारांचे रोख पारितोषिक तसेच चषक देऊन गौरवण्यात आले. लायबा कॅरम मास्टर्सने तिसरे स्थान पटकावले. मोहम्मद अरिफ हा लीगमधील सर्वोत्तम खेळाडू ठरल्याने त्यालाही रोख पारितोषिक व चषक देऊन सन्मानित करण्यात आले. त्याशिवाय स्पर्धेत व्हाईट स्लॅम व ब्लॅक स्लॅमद्वारे विजय नोंदवणाऱ्या खेळाडूंनाही रोख रकमेसह गौरवण्यात आले.