
ठाणे : दादोजी कोंडदेव क्रीडा स्टेडियमवर वारंवार होणाऱ्या टेनिस बॉल क्रिकेट स्पर्धांमुळे ज्या उद्देशाने हे मैदान विकसित करण्यात आले होते, किंबहुना ज्या हेतूने याचा चेहरामोहरा बदलण्यात आला होता. त्या हेतूलाच हरताळ फासला जात आहे. त्यात असेच सामने होत राहिले तर बीसीसीआय, एमसीएने दिलेली मान्यता रद्द होण्याची भिती आता व्यक्त केली जात आहे.
तसे झाल्यास या मैदानात भविष्यात अंडर १७, आयपीएल किंवा विजय हजारे सारख्या स्पर्धाच होऊ शकणार नाहीत. त्यामुळे आता हे स्टेडीयम यापुढे केवळ सिझन बॉल क्रिकेट स्पर्धेसाठीच उपलब्ध करून दिले जाणार आहे. तशा स्वरूपाचा प्रस्ताव नुकत्याच झालेल्या प्रशासकीय महासभेत मंजुर करण्यात आला आहे.
ठाणे शहराच्या मध्यवर्ती भागात ठाणे महापालिकेचे दादोजी कोंडदेव क्रीडागृह आहे. मागील काही वर्षात या मैदानाचा कायापालट करण्यात आला आहे. याठिकाणी राष्ट्रीय तसेच आंतरराष्ट्रीय दर्जाचे क्रिकेट सामने व्हावेत या उद्देशाने या मैदानाच्या विकासासाठी कोट्यावधींचा निधी खर्च करण्यात आला आहे. तसेच मैदानातील मुख्य खेळपट्टी व आऊट फिल्डचे नुतनीकरणाचे काम पूर्ण झाल्यावर येथील मैदानची नोंद बीसीसीआय, एमसीए मार्फत घेण्यात आल्याने येथे फक्त सिझन बॉल क्रिकेट स्पधा व सरावाचे आयोजन करण्याबाबतची अट यापूर्वी विभागामार्फत दिलेली आहे. त्यात टेनिस बॉल क्रिकेट स्पर्धांसाठी महापालिकेच्या माध्यमातून मौलाना अबुल कलाम आझाद क्रीडा संकुल, बोरीवडे येथील मैदान उपलब्ध करून देण्यात आले आहे. परंतु असे असतानाही दादोजी क्रीडागृहात टेनिस बॉल क्रिकेटच्या स्पर्धा घेतल्या जात आहेत. विशेष म्हणजे टेनिस बॉल क्रिकेट खेळण्यासाठीचा प्रस्ताव देखील २०२३ मध्ये मान्यता देण्यात आली होती.
परंतु ही मान्यता दिल्यानंतर या मैदानात टेनिस बॉल स्पर्धांचेच आयोजन अधिक प्रमाणात होत असल्याचे दिसून आले. त्यामुळे बीसीसीआय, एमसीए मार्फत आयोजित विविध रणजी सामन्यांना प्राधान्य देता येणे शक्य नसल्याचे दिसून आले आहे. तसेच यावर्षी याचा फटका बीसीसीआयच्या महिला क्रिकेट स्पर्धा तसेच अंडर १७ वयोगटातील विजय हजारे या स्पर्धांचे आयोजन करता येणे शक्य झाले नसल्याची गंभीर बाब समोर आली आहे. येथील मुख्य फिल्ड व मैदान सिझन बॉल क्रिकेट्या दृष्टिकोनातून तयार करण्यात आला आहे. परंतु त्याठिकाणी टेनिस बॉल क्रिकेट्या स्पर्धा होत असल्याने या मैदानाची जास्त झिज होऊन नुकसान होत असल्याचे प्रशासनाच्या आता निदर्शनास आले आहे. तसेच यामुळे बीसीसीआय, एमसीए ने दिलेली मान्यता देखील रद्द होऊ शकते अशी भीती महापालिकेला वाटू लागल्याने अखेर त्यांनी टेनिस क्रिकेट स्पर्धा खेळविण्याचा निर्णय मागे घेतला असून आता याठिकाणी केवळ सिझन बॉल क्रिकेट स्पर्धा होतील.