अटलांटा : काँगोने फिफा विश्वचषकात उझबेकिस्तानचा ३-१ असा पराभव करत बाद फेरीत धडक मारली आहे. विश्वचषकाच्या इतिहासात काँगोने पहिल्यांदाच बाद फेरीत प्रवेश करून इतिहास घडवला आहे. आता बाद फेरीत काँगोचा सामना इंग्लंडशी होणार आहे. या विजयामुळे काँगो संघ बाद फेरीत पोहोचणारा आठवा आफ्रिकन देश ठरला आहे.
सामन्याच्या सुरुवातीला १०व्या मिनिटाला उझबेकिस्तानच्या एल्डोर शोमुरोदोव्हने गोल करत १-० अशी आघाडी मिळवली होती. मात्र, दुसऱ्या सत्रात काँगोने दमदार पुनरागमन केले. ६८ व्या मिनिटाला योआने विसाला पेनल्टी क्षेत्रात पाडल्यानंतर पेनल्टी मिळाली. विसाने अचूक गोल करत धावसंख्या १-१ अशी बरोबरीत आणली. त्यानंतर १० मिनिटांनी बदली खेळाडू फिस्टन मायलेने गोल करत काँगोला २-१ अशी आघाडी मिळवून दिली. सामन्याच्या भरपाई वेळेत विसाने आपला दुसरा आणि संघाचा तिसरा गोल करत ३-१ असा विजय निश्चित केला.
काँगोचे प्रशिक्षक सॅबेस्टियन डेसाब्रे म्हणाले की, “आमचा संघ गोल खाल्ल्यानंतर कसा लढा द्यायचा, हे जाणतो. आम्ही पूर्ण जिद्दीने आणि निर्धाराने खेळ सुरू ठेवला. १९७४ मध्ये झैरेच्या नावाने खेळल्यानंतर काँगोने ५२ वर्षांच्या प्रतीक्षेनंतर ही कामगिरी केली आहे.”
