अर्लिंग्टन : तारांकित फुटबॉलपटू ख्रिस्तियानो रोनाल्डोचे विश्वचषक विजयाचे स्वप्न अद्याप कायम आहे. आता सोमवारी मध्यरात्री रोनाल्डोच्या पोर्तुगाल संघाची झुंजार वृत्तीच्या स्पेनशी पडणार आहे. त्यामुळे पोर्तुगाल त्यांना नमवून उपांत्यपूर्व फेरी गाठणार का, याकडे अवघ्या विश्वाचे लक्ष लागून आहे.
एकीकडे अमेरिका आणि इराण यांच्यातील युद्धजन्य स्थिती कायम असतानाच फिफा विश्वचषकाचा महासंग्राम जागतिक महासत्तेसह मेक्सिको व कॅनडाच्या रणभूमीवर सुरू आहे. १२ जून ते २० जुलै या कालावधीत (भारतीय वेळ आणि तारखांनुसार) अमेरिका, मेक्सिको आणि कॅनडा येथे संयुक्तपणे फिफा विश्वचषकाच्या २३व्या पर्वाचा थरार रंगत आहे. यंदा प्रथमच तीन देश संयुक्तपणे विश्वचषकाचे यजमानपद भूषवत असुन
पहिल्यांदाच ४८ संघही सहभागी झाले होते. जर्मनी, नेदरलँड्स, उरुग्वे या संघांचे आव्हान संपुष्टात आले असून पहिलाच विश्वचषक खेळणारा केप व्हर्डे, जपान, काँगो प्रजासत्ताक या संघांनी गारद होण्यापूर्वी सर्वांची मने जिंकली. आता विश्वचषक स्पर्धेचा थरार उपउपांत्यपूर्व फेरीच्या टप्प्यावर असून प्रत्येकी लढतीनंतर थरार वाढत आहे.
दरम्यान, पोर्तुगालने राऊंड ऑफ ३२ लढतीत क्रोएशियावर २-१ अशी सरशी साधली होती. २५ वर्षीय आक्रमणपटू गॉझालो रामोसने भरपाई वेळेत केलेल्या निर्णायक गोलच्या बळावर पोर्तुगालने क्रोएशियावर २-१ अशी पिछाडीवरून मात केली.
रोनाल्डोने या स्पर्धेत आतापर्यंत ३ गोल केले आहेत. मात्र तरीही त्याला लौकिकानुसार खेळ करता आलेला नाही, असे जाणकारांचे म्हणणे आहे. २०१८मध्ये स्पेनविरुद्धच रोनाल्डोने हॅटट्रिक साकारली होती. त्यामुळे आता ८ वर्षांनी रोनाल्डो पुन्हा चमक दाखवून टीकाकारांची तोंडे बंद करणार का, हे पाहणे रंजक ठरेल. दुसरीकडे स्पेनचा संघ सांघिक कामगिरीसाठी ओळखला जातो. त्यांची मदार लॅमिन यमाल, ओयरझबाल, पेड्री या खेळाडूंवर आहे. स्पेनला यंदा जेतेपदासाठी प्रबळ दावेदार मानले जात असून त्यांनी या विश्वचषकात अद्याप एकही गोल प्रतिस्पर्धी संघाला करू दिलेला नाही. त्यामुळे पोर्तुगालच्या आक्रमकांचा स्पेनच्या बचावपटूंविरुद्ध कस लागेल.
आजचे सामने
स्पेन वि. पोर्तुगाल (मध्यरात्री १२.३० वाजता)
बेल्जियम वि. अमेरिका (मंगळवारी पहाटे ५.३० वाजता)
थेट प्रक्षेपण: यूनाइट८ स्पोर्ट्स, झी सिनेमा आणि झी५ ॲप
