भारत आणि ऑस्ट्रेलियामध्ये (IND vs AUS) बॉर्डर- गावस्कर ट्रॉफीचा पहिला कसोटी सामना नागपूरच्या विदर्भ क्रिकेट असोसिएशन मैदानात खेळवण्यात येत आहे. आज दुसऱ्या दिवशी एकीकडे ऑस्ट्रेलियाच्या गोलंदाजीपुढे भारतीय फलंदाज अपयशी ठरत असताना दुसरीकडे कर्णधार रोहित शर्मा (Rohit Sharma) एका बाजूने झुंज देत आहे.
त्याने कर्णधार पडला साजेशी शतकी खेळी करत अनेक विक्रम केले. त्याने आपल्या कसोटी कारकिर्दीतला ९वे शतक साजरे केले. तसेच, तो क्रिकेटच्या तीनही फॉरमॅटमध्ये शतक झळकावणारा पहिला भारतीय कर्णधार ठरला आहे. याआधी जागतिक क्रिकेटमध्ये फक्त ४ कर्णधारांना ही कामगिरी जमली आहे.
ऑस्ट्रेलियाच्या मर्फीच्या जाळ्यात अडकले दिग्गज
ऑस्ट्रेलियाकडून पदार्पण करणाऱ्या टॉड मर्फीने भारताच्या ४ फलंदाजांना बाद करत नवा विक्रम केला. नॅथन लायनने सूर्यकुमार यादवला ८ धावांवर बाद केले. तर त्याआधी, विराट कोहली १२, चेतेश्वर पुजारा ७, रविचंद्रन अश्विन २३ आणि केएल राहुल २० धावांवर बाद झाले. तर सध्या रोहित शर्मा हा नाबाद असून त्याच्या जोडीला रवींद्र जडेजाने संयमी खेळत सहाव्या विकेटसाठी चांगली भागीदारी केली आहे.
