ऑकलंड : एकीकडे भारतातील नागरिकांना दिवाळीचे वेध लागलेले असतानाच बुधवारी न्यूझीलंडमध्ये ‘रोको’ म्हणजेच रोहित शर्मा आणि विराट कोहली यांच्या पुनरागमनाची उत्सुकताही शिगेला पोहोचली आहे. भारत-न्यूझीलंड यांच्यातील एकदिवसीय मालिकेला बुधवारपासून प्रारंभ होत असून पहिली लढत ऑकलंड येथे रंगणार आहे. त्यामुळे शुभमन गिलच्या नेतृत्वात खेळणारा भारतीय संघ मिचेल सँटनरच्या न्यूझीलंडवर वर्चस्व गाजवण्यास आतुर असेल.
श्रेयस अय्यरच्या नेतृत्वात भारताने टी-२० मालिकेत २-३ अशी बाजी मारली. आता रोहित आणि विराट यांच्या कारकीर्दीतील अखेरच्या न्यूझीलंड दौऱ्याची सर्वत्र चर्चा असली, तरी भारताच्या अनुभवहीन वेगवान गोलंदाजीच्या फळीमुळे न्यूझीलंडला मालिकेत वरचढ ठरण्याची संधी आहे. जसप्रीत बुमराला कसोटी मालिकेसाठी विश्रांती देण्यात आली आहे. तसेच प्रसिध कृष्णा आणि हर्षित राणा अद्याप आंतरराष्ट्रीय क्रिकेटमध्ये पुनरागमनासाठी सज्ज नसल्याने मोहम्मद सिराजवर अतिरिक्त जबाबदारी असेल. अर्शदीप सिंग (१८ सामने), गुर्नूर ब्रार (९), अंशुल कंबोज आणि आकिब नबी (प्रत्येकी एक) या चार वेगवान गोलंदाजांचा एकत्रित अनुभव केवळ २९ एकदिवसीय सामन्यांचा आहे.
दरम्यान, नवरात्रोत्सव उत्साहात पार पडल्यानंतर येथे भारताच्या न्यूझीलंड वारीला प्रारंभ झाला होता. २२ ऑक्टोबरपासून भारतीय संघ न्यूझीलंड दौऱ्यावर असून त्यांनी सलग तिसऱ्यांदा टी-२० मालिका जिंकण्याचा पराक्रम केला. ५ एकदिवसीय व २ कसोटी सामन्यांचा देखील समावेश आहे. आता टी-२० मालिकेनंतर ४ नोव्हेंबरपासून सुरू होणाऱ्या एकदिवसीय मालिकेकडे सर्वांचे लक्ष लागून असेल.
पहिल्या तीन लढतींमध्ये कस
न्यूझीलंडविरुद्धची एकदिवसीय मालिका १५ नोव्हेंबरला संपणार असून १९ नोव्हेंबरपासून वेलिंग्टन येथे पहिली कसोटी सुरू होणार आहे. त्यामुळे कसोटी खेळणाऱ्या काही प्रमुख खेळाडूंना अखेरच्या दोन एकदिवसीय सामन्यांना मुकावे लागणार आहे. यामध्ये गिल, राहुल, कंबोज यांचा समावेश आहे. उर्वरित दोन लढतींसाठी तिलक वर्मा, कुमार कुशाग्र यांना संधी देण्यात आली आहे. तसेच श्रेयस कर्णधार झाल्यावर इशान किशन एकदिवसीय संघाचा उपकर्णधार असेल. नितीश रेड्डी, मोहम्मद सिराज, कुलदीप यादव यांना मात्र पाचही एकदिवसीय लढतींसह कसोटी मालिकेसाठीही संघात कायम राखण्यात आले आहे. अशा स्थितीत पहिल्या तीन एकदिवसीय लढतींमध्ये भारत पूर्ण ताकदीनिशी खेळेल, असे अपेक्षित आहे.
भारताने २०२२-२३मध्ये न्यूझीलंड येथे झालेल्या एकदिवसीय मालिकेत यजमानांना १-० असे नमवले होते.
गिलने यंदाच्या वर्षात एकदिवसीय क्रिकेटमध्ये सर्वाधिक ८९५ धावा केल्या आहेत. त्याने ११ सामन्यांत ३ शतके व ५ अर्धशतकांसह १११च्या सरासरीने धावा केल्या आहेत. यामध्ये वेस्ट इंडिजविरुद्ध सप्टेंबर महिन्यात झळकावलेल्या द्विशतकाचाही समावेश आहे. इंग्लंडचा बेन डकेट (७३७) दुसऱ्या स्थानी आहे.
रोहितने न्यूझीलंडमध्ये १३ एकदिवसीय सामने खेळले आहेत. मात्र आजवर त्याला येथे एकही शतक साकारता आलेले नाही. १३ डावांत रोहितची सरासरी ३६.४१ इतकी आहे. गेल्या वर्षभरात ऑस्ट्रेलिया, इंग्लंड या संघांविरुद्ध त्यांच्याच भूमीत शतक साकारणारा रोहित आता येथील शतकाचा दुष्काळ संपुष्टात आणण्यास आतुर असेल.
खेळपट्टी आणि वातावरणाचा अंदाज
ऑकलंडचे मैदान हे आकाराने फारच लहान असून येथील समोरील सीमारेषा फक्त ६० मीटर अंतरावर आहे. याच मैदानावर चौथ्या टी-२० सामन्यात न्यूझीलंडने २५९ धावांचा डोंगर उभारला होता. बुधवारी पहिल्या लढतीसाठी खेळपट्टी वेगवान गोलंदाजांसाठीही काहीशी लाभदायक असेल. लढतीवर पावसाचे सावट मूळीच नाही. मात्र वेगवान वाहणारे वारे व हवेतील थंडावा फलंदाजांसाठी आव्हानात्मक ठरू शकतो.
न्यूझीलंडला खेळाडूंच्या दुखापतींची चिंता
न्यूझीलंडसमोरही वेगळे आव्हान आहे. कर्णधार मिचेल सँटनरच्या म्हणण्यानुसार, न्यूझीलंडच्या एकदिवसीय संघातील खेळाडूंचे सरासरी वय ३४ ते ३५ वर्षांच्या दरम्यान आहे. २०२७चा विश्वचषक हा काही वरिष्ठ खेळाडूंच्या कारकिर्दीतील अखेरचा मोठा टप्पा ठरू शकतो, असे संकेत सँटनरने दिले आहेत. त्यामुळे न्यूझीलंडच्या अनुभवी खेळाडूंच्या कामगिरीकडेही सर्वांचे लक्ष असेल. डेवॉन कॉन्वे कन्कशनमुळे या लढतीस मुकणार आहे. रचिन रवींद्र दुखापतीमुळे आधीच बाहेर गेला आहे. तसेच मार्क चॅपमनही संघाचा भाग नसेल. फलंदाजीत डॅरेल मिचेल, ग्लेन फिलिप्स यांच्यावर किवींची भिस्त आहे. गोलंदाजीत लॉकी फर्ग्युसन नसल्याने जेकब डफी, कायले जेमिसन यांच्यावर मदार असेल. टॉम लॅथम व विल यंग यांची फलंदाजांची जोडी भारतासाठी डोकेदुखी ठरू शकते. मॅट हेन्रीदेखील पहिल्या लढतीसाठी अनुपलब्ध असेल, असे समजते.
सिराज, अर्शदीपवर गोलंदाजीची मदार
ईडन पार्कवरील सरळ सीमारेषा लक्षात घेता भारत तीन वेगवान गोलंदाजांसह मैदानात उतरण्याची शक्यता आहे.
सध्याच्या भारतीय संघात २०१ बळींसह कुलदीप यादव हा सर्वाधिक यशस्वी एकदिवसीय गोलंदाज आहे. मात्र, हार्दिक पंड्याच्या अनुपस्थितीत संघातील संतुलन राखण्याचे आव्हान असल्याने कुलदीपच्या अंतिम अकरातील निवडीबाबत प्रश्न निर्माण झाला आहे. सिराज व अर्शदीप यांच्यावर प्रामुख्याने वेगवान माऱ्याची धुरा असेल. कृष्णा एकदिवसीय मालिकेस मुकणार आहे.
“एकदिवसीय आणि कसोटी या दोन्ही प्रकारांना महत्त्व आहे. मात्र, दोन्ही मालिकांमध्ये फार कमी अंतर असल्याने खेळाडूंच्या कामगिरीचा आणि तंदुरुस्तीचा ताळमेळ राखणे आवश्यक आहे. टी-२० मालिकेपूर्वी एकदिवसीय मालिका असती, तर सर्व खेळाडूंना पाचही लढती खेळता आल्या असत्या,” असे गिल म्हणाला.
आघाडीच्या त्रिकुटावर फलंदाजीत भिस्त
वेस्ट इंडिजविरुद्ध सप्टेंबरमध्ये झालेल्या मालिकेत भारताने एका लढतीत ४०० धावांचा यशस्वी पाठलाग केला. त्या मालिकेत गिलने द्विशतक साकारण्यासह रोहित, विराट यांनीदेखील शतके झळकावली होती. त्यामुळे या तिघांवरच भारताची फलंदाजी प्रामुख्याने अवलंबून असेल.
उपकर्णधार श्रेयस अय्यर आणि अनुभवी यष्टिरक्षक फलंदाज के. एल. राहुल यांच्यावर मधल्या फळीची जबाबदारी असेल. अक्षर पटेल आणि नितीश रेड्डी हे सहाव्या-सातव्या क्रमांकावर खेळू शकतात. नितीश केवळ पहिल्या लढतीसाठी उपलब्ध आहे. हर्षित राणा अनुपस्थित असल्याने आठव्या क्रमांकावर अंशुल कंबोजच्या आक्रमक फलंदाजीचा उपयोग केला जाऊ शकतो. नमन धीरलाही संधी मिळू शकते.
प्रतिस्पर्धी संघ
भारत : शुभमन गिल (कर्णधार), रोहित शर्मा, विराट कोहली, श्रेयस अय्यर, के. एल. राहुल, नितीश रेड्डी, अक्षर पटेल, नमन धीर, अंशुल कंबोज, गुर्नूर ब्रार, ऋतुराज गायकवाड, अर्शदीप सिंग, इशान किशन, मोहम्मद सिराज, कुलदीप यादव, आकिब नबी.
न्यूझीलंड : मिचेल सँटनर (कर्णधार), मायकेल ब्रेसवेल, डेवॉन कॉन्वे, जेकब डफी, मॅथ्यू फिशर, मॅट हेन्री, कायले जेमिसन, टॉम लॅथम, डॅरेल मिचेल, हेन्री निकोल्स, ग्लेन फिलिप्स, टिम सेईफर्ट, नॅथन स्मिथ, ब्लेर टिकनर, विल यंग.
वेळ : सकाळी ७.३० वाजता
थेट प्रक्षेपण : सोनी टेन १, ३ वाहिनी आणि सोनी लिव्ह ॲप