माऊंट माँगानुइ : न्यूझीलंडविरुद्धच्या एकदिवसीय मालिकेतील पाचव्या आणि अखेरच्या सामन्यात भारतीय फलंदाजांना स्विंग आणि सीम गोलंदाजीविरुद्ध आपली कामगिरी सुधारण्याचे मोठे आव्हान असणार आहे. मालिकेत २-१ अशी आघाडी घेतलेल्या भारतीय संघाला रविवारी होणाऱ्या निर्णायक सामन्यात विजय मिळवून मालिका जिंकण्याची संधी आहे.
शुक्रवारी झालेल्या चौथ्या लढतीत भारताला एकदिवसीय क्रिकेटमधील दुसऱ्या क्रमांकाचा सर्वात मोठा पराभव स्वीकारावा लागला. ३३४ धावांच्या लक्ष्याचा पाठलाग करताना भारतीय संघाचा डाव अवघ्या ८९ धावांत २६.४ षटकांत आटोपला. न्यूझीलंडचा वेगवान गोलंदाज मॅट हेन्रीने पहिल्याच षटकात तीन धक्के देत भारताच्या पराभवाची पायाभरणी केली. विशेषतः रोहित शर्मा, विराट कोहली आणि कर्णधार श्रेयस अय्यर हे भोपळाही फोडू शकले नाहीत. हेन्री कसोटी मालिकेच्या तयारीसाठी गेल्याने तो पाचव्या लढतीस नसेल.
भारतीय फलंदाजीची सामूहिक अपयशाची कामगिरी पाहता केवळ एका फलंदाजाला दोष देणे योग्य ठरणार नाही. मात्र, रोहित आणि श्रेयस यांना या मालिकेत अद्याप अपेक्षित प्रभाव पाडता आलेला नाही. कर्णधारपदाच्या पदार्पणातही श्रेयसला छाप पाडता आली नाही. हेन्रीच्या अप्रतिम चेंडूवर रोहित चकला, तर आतल्या बाजूने वेगाने आलेल्या चेंडूवर श्रेयस पाय रोवून उभा राहिल्याने बाद झाला.
भारताचे मुख्य प्रशिक्षक गौतम गंभीर यांनी संघाच्या गडगडलेल्या डावाबद्दल चिंता व्यक्त केली. ते म्हणाले, "विश्वचषकादरम्यान मिळू शकणाऱ्या परिस्थितीच्या सर्वाधिक जवळच्या या परिस्थिती आहेत. मोठी चिंता धावांची नाही, तर अवघ्या २६-२७ षटकांत संपूर्ण संघ बाद झाला, ही आहे. ही बाब निश्चितच चिंताजनक आहे." २०२७ मध्ये दक्षिण आफ्रिकेत होणाऱ्या एकदिवसीय विश्वचषकाच्या पार्श्वभूमीवर वेगवान आणि सीम गोलंदाजीला अनुकूल खेळपट्ट्यांवर भारतीय फलंदाजांनी चांगली कामगिरी करणे आवश्यक आहे.
रोहित आणि विराट यांच्यासाठी न्यूझीलंडचा हा दौरा अखेरचा ठरू शकतो. त्यामुळे या मालिकेतील अखेरच्या सामन्यात चाहत्यांना त्यांच्या फलंदाजीची आतुरता असेल. त्यामुळे दोघांकडूनही या दौऱ्याचा शेवट शानदार व्हावा, अशी अपेक्षा आहे.
दुसरीकडे, मालिका बरोबरीत ठेवण्यासाठी न्यूझीलंडला पाचवा सामना जिंकणे अनिवार्य आहे. मिचेल सँटनरच्या नेतृत्वात खेळणाऱ्या या संघाची भिस्त टिम सेईफर्ट, विल यंग व मॅट फिशर यांच्यावर आहे.
ब्रार-कुलदीप यांच्यात अदलाबदली
१९ नोव्हेंबरपासून वेलिंग्टन येथे सुरू होणाऱ्या न्यूझीलंडविरुद्धच्या दोन सामन्यांच्या कसोटी मालिकेसाठी भारतीय संघात गुर्नूर ब्रारचा समावेश केला आहे. कुलदीप यादवला कसोटी संघातून मुक्त करण्यात आले आहे, जेणेकरून तो भारतात सुरू असलेल्या देशांतर्गत क्रिकेट स्पर्धामध्ये खेळू शकेल. तसेच पाचव्या एकदिवसीय लढतीसाठी ब्रार भारतीय संघाचा भाग नसेल. तो कसोटी मालिकेच्या तयारीसाठी वेलिंग्टनला दाखल झाला आहे. अशा स्थितीत कुलदीपला पुन्हा संधी मिळू शकते. दरम्यान, यष्टिरक्षक-फलंदाज ऋषभ पंत वेलिंग्टनमध्ये कसोटी संघासोबत सामील झाला आहे.