अल अमेरात (ओमान) : १९ वर्षांखालील एकदिवसीय आशिया चषक स्पर्धेत रविवारी भारत आणि पाकिस्तान यांच्यात महामुकाबला रंगणार आहे. अ गटातील या महत्त्वपूर्ण सामन्यात भारताला मागील पराभवाचा वचपा काढण्याची संधी मिळणार आहे. स्पर्धेतील पहिल्या सामन्यात दणदणीत विजय मिळवला असल्याने दोन्ही संघांचा आत्मविश्वास उंचावलेला आहे.
भारताने शुक्रवारी नेपाळचा १० विकेट्सनी धुव्वा उडवला. नेपाळने दिलेले १२८ धावांचे लक्ष्य भारताने अवघ्या १९.१ षटकांत एकही विकेट न गमावता पार केले. दुसरीकडे, यजमान संयुक्त अरब अमिरातीचा पाकिस्तानने नऊ विकेट्सनी पराभव केला. यूएईने दिलेले २२५ धावांचे लक्ष्य पाकिस्तानने ३७.३ षटकांत गाठले. साखळी फेरीतील दोन्ही संघांचा हा शेवटच्या आधीचा सामना असल्याने त्याला विशेष महत्त्व आहे. या विजयामुळे विजेत्या संघाला गटात अव्वल स्थान मिळवण्याची संधी निर्माण होईल. तसेच पहिल्या दोन संघांमध्ये स्थान मिळवून उपांत्य फेरीतील प्रवेश निश्चित करण्याच्या दृष्टीनेही हा सामना निर्णायक ठरू शकतो.
प्रतिस्पर्धी संघ
भारत : लक्ष्य रायचंदानी (कर्णधार), आर्यवीर सेहवाग, व्ही. के. विनीत, यशवर्धन सिंग चौहान, कुशाग्र ओझा, अर्जुन राजपूत, मनाल चौहान, अन्वय द्रविड, रजत बघेल, व्ही. यशवीर, आर्यन सावसानी, मोहिद उल्वा, काव्या पटेल, शाविन विनोद, इशान सूद.
पाकिस्तान : फरहान युसूफ (कर्णधार), अब्दुल कादिर, अब्दुल सुब्हान, अहमद हुसेन, अली रझा, हमजा जहूर, हसनैन अब्बास दार, हयाम खान, हुजैफा अहसान, जहांगीर बिलाल, मोहम्मद हुजैफा, मोहम्मद सयाम, निकाब शफीक, रिझवानुल्लाह, उस्मान खान.
सामन्याची वेळ : सकाळी १० वाजता.