वडोदरा : टी-२० मालिकेत दणदणीत यश मिळवल्यानंतर नवी कर्णधार स्मृती मानधनाच्या नेतृत्वाखालील भारतीय संघ आता झिम्बाब्वेविरुद्धच्या तीन सामन्यांच्या एकदिवसीय मालिकेत आपले वर्चस्व प्रस्थापित करण्यासाठी सज्ज झाला आहे. वडोदरा येथील कोटंबी स्टेडियमवर शुक्रवारी सुरू होणाऱ्या पहिल्या एकदिवसीय सामन्यात गतविजेता भारतीय संघ विजयाची मालिका कायम ठेवण्यासाठी उतरेल. झिम्बाब्वेविरुद्ध टी-२० मालिकेत ३-० असा विजय मिळवत मंधानाने आपल्या कर्णधारपदाची दमदार सुरुवात केली होती.
मांडीच्या दुखापतीमुळे जेमिमा रॉड्रिग्ज या मालिकेला मुकली असून, तिच्या अनुपस्थितीत मधल्या फळीतील पोकळी भरून काढण्याचे आव्हान संघापुढे आहे. टी-२० मालिकेत अनुष्का शर्मा आणि निकी प्रसाद यांना संधी देण्यात आली होती, तर एकदिवसीय मालिकेत तिसऱ्या क्रमांकासाठी हरलीन देओल आणि प्रतिक रावल हे दोन पर्याय संघाकडे उपलब्ध आहेत. मात्र, या दोघीही आक्रमक फलंदाजीसाठी ओळखल्या जात नसल्यामुळे अनुभवी हरमनप्रीत कौरवर मोठी जबाबदारी असणार आहे. नुकत्याच झालेल्या सामन्यांमध्ये फारशी संधी न मिळालेल्या हरमनप्रीतने अंतिम टी-२० सामन्यात ४१ चेंडूंत १० चौकार आणि ५ षटकारांसह ९१ धावांची खेळी करत फॉर्मात परतण्याचे संकेत दिले आहेत.
विशेष फलंदाज म्हणून हरमनप्रीत कौर ५० षटकांच्या मालिकेत अत्यंत महत्त्वाची भूमिका बजावेल. कर्णधारपदाच्या दबावाविना तिची आक्रमक फलंदाजी भारतासाठी प्रभावी ठरणार आहे. डावाच्या सुरुवातीला शफाली वर्मा झिम्बाब्वेसाठी मोठा धोका ठरू शकते, तर गोलंदाजीत श्री चरणीच्या मारा पाहुण्या संघाच्या अडचणी वाढवू शकतो.
वेळ : दुपारी २ वाजता
थेट प्रक्षेपण : स्टार स्पोर्ट्स १
