जयपूर : राजस्थान रॉयल्सविरुद्धच्या सामन्यात कोहलीचा विराट करिश्मा पाहायला मिळाला. त्याच्या शतकी खेळीच्या जोरावर रॉयल चॅलेंजर्स बंगळुरूने ३ बाद १८३ धावा उभारल्या. त्याचबरोबर आयपीएलमध्ये ७५०० धावांचा टप्पा गाठणारा विराट हा पहिला फलंदाज ठरला. त्याचे हे आयपीएलमधील आठवे शतक ठरले.
सातव्या षटकांत चौथ्या चेंडूवर एकेरी धाव घेत त्याने साडेसात हजार धावांचे शिखर गाठले. त्याच्या नावावर २४२ सामन्यांत ५२ अर्धशतकेही जमा आहेत. कोहलीखालोखाल शिखर धवनचा (६७५५) क्रमांक लागतो. विराट कोहली आणि फॅफ ड्यू प्लेसिस यांनी राजस्थानच्या गोलंदाजांवर हल्लाबोल केला. कोहलीने ३९ चेंडूंत अर्धशतक साजरे केल्यानंतर पुढील २८ चेंडूंत त्याने शतकाला गवसणी घातली. त्याने ७२ चेंडूंत १२ चौकार आणि ४ षटकारांसह नाबाद ११३ धावा फटकावल्या.
कोहली-ड्यू प्लेसिस यांनी सलामीसाठी १२५ धावा जोडल्या. ड्यू प्लेसिसने ४४ धावांचे योगदान दिले. ग्लेन मॅक्सवेल (१) आणि सौरव चौहान (९) हे फलंदाज अपयशी ठरले. राजस्थानकडून यजुर्वेंद्र चहलने दोन विकेट्स मिळवले.
आयपीएल गुणतालिका
संघ - सामने - जय - पराजय - गुण - धावगती
कोलकाता - ३ - ३ - ० - ६ - २.५१८
राजस्थान - ३ - ३ - ० - ६ - १.२४९
चेन्नई - ४ - २ - २ - ४ - ०.५१७
लखनऊ - ३ - २ - १ - ४ - ०.४८३
हैदराबाद - ४ - २ - २ - ४ - ०.४०९
पंजाब - ४ - २ - २ - ४ - -०.२२०
गुजरात - ४ - २ - २ - ४ - -०.५८०
बंगळुरू - ४ - १ - ३ - २ - -०.८७६
दिल्ली - ४ - १ - ३ - २ - -१.३४७
मुंबई - ३ - ० - ३ - ० - -१.४२३
